राष्ट्रिय सभालाई महत्वहीन बनाइँदैछः अध्यक्ष दाहाल

१२ चैत, चितवन । राष्ट्रिय सभाका अध्यक्ष नारायणप्रसाद दाहालले अझै पनि राष्ट्रिय सभाको महत्व धेरैले बुझ्न नसकेको बताएका छन् । उनले राष्ट्रिय सभालाई महत्वहीन बनाउन खोजिएको बताएका छन् । 

राष्ट्रिय सभामा अधिकांश विधेयक सर्वसम्मत पारित हुने गरेको भन्दै उनले राष्ट्रिय सभामा राजनीतिक दृष्टिकोणले नभई राष्ट्र र जनताको दृष्टिले हेरेर छलफल हुने र राष्ट्रिय सभामा आउने विधेयक लामो समय नरोकिने बताए । चितवनमा सोमबार पत्रकारहरूसँग कुराकानी गर्दै उनले स्थानीय तह र प्रदेशसभाको सेतुको रुपमा राष्ट्रिय सभाले काम गर्ने बताए ।  

प्रदेश र स्थानीय तहका भावना, समस्या, जटिलता र सम्भावना राष्ट्रिय सभामा विषयवस्तु बनाएर छलफल सुरु गनिसकिएको अध्यक्ष दाहालको भनाइ छ । त्यहाँ छलफल भएका विषयवस्तु प्रतिनिधिसभा हुँदै सरकारसम्म पुग्ने उनले बताए । 
 
हरेक महिनाको अन्तिम साता सातै प्रदेशका समस्या र ती समस्या समाधानका विषयमा राष्ट्रिय सभामा छलफल सुरु गरिएको अध्यक्ष दाहालले बताए । प्रदेशका सबै काम कारबाहीका बारेमा सातै प्रदेशबाट प्रतिनिधित्व गर्ने माननीयले कुरा उठाउने व्यवस्था गरेको उनको भनाइ छ । 
 
विगत ६ वर्षको अवधिमा राष्ट्रिय सभामा चार विधेयक उत्पत्ति भएको उल्लेख गर्दै अध्यक्ष दाहालले ती सबै सर्वसम्मत रुपमा पारित गरी पठाएको बताए । राष्ट्रिय सभामा राजनीतिभन्दा पनि आवश्यकताका आधारमा छलफल हुने गरेको अध्यक्ष दाहालको भनाइ थियो । राष्ट्रिय सभाले राष्ट्रिय महत्व र सार्वजनिक महत्वका विषयलाई प्राथमिकता दिने गरेको उनले बताए ।