अछाममा ट्याक्टर दुर्घटना, ५ जनाको मृत्यु

१२ चैत, धनगढी । अछामको मेल्लेखमा ट्याक्टर दुर्घटना हुँदा ५ जनाको मृत्यु भएको छ। सोमबार बिहान मेल्लेख गाँउपलिका- ७ सुयेडीमा टयाक्टर दुर्घटना हुँदा  ५ जनाको मृत्यु भएको अछामका प्रहरी प्रमुख डीएसपी सन्तोष पाठकले बताए । उनका अनुसार दुर्घटनामा तीन जना घाइते भएका छन् । 

घाइतेको उपचारका लागि अछामकै बयलपाटा अस्पताल पठाइएको उनको भनाइ छ । मेल्लेखको षोडशाबाट साँफेबगर जाने क्रममा ट्याक्टर सुयेडी नजिकै दुर्घटना भएको पाठकले बताए । ट्याक्टर सडकबाट ५० मिटर तल खसेको थियो । दुर्घटनाको कारण पहिल्याउन अनुसन्धान भइरहेको डीएसपी पाठकले बताए ।

उनका अनुसार दुर्घटनामा अन्य तीन जना घाइते भएका छन् । दुर्घटनाको विस्तृत विवरण प्राप्त भइ नसकेको उनले बताए । घाइतेहरूलाई उपचारका लागि बयलपाटा अस्पताल लगिएको छ ।