आन्तरिक राजश्व विभागका महानिर्देशक बराल डेढ महिना मै फालिए, नयाँ डीजीका लागि हुँदैछ मोल-मोलाई

१३ चैत, काठमाडौं । अर्थमन्त्री वर्षमान पुनले डेढ महिनामै आन्तरिक राजश्व विभागका महानिर्देशकको सरुवा गरेका छन् । गत माघ १९ गते मात्र तत्कालीन अर्थमन्त्री डा. प्रकाश शरण महतले  मन्त्रालयकै वित्तीय क्षेत्र व्यवस्थापन तथा संस्थान समन्वय महाशाखामा कार्यरत सहसचिव भूपाल बराललाई आन्तरिक राजश्व विभागको महानिर्देशक बनाएका थिए । अर्थमन्त्री पुनले उनलाई मन्त्रालय नै फरक पारेर वन तथा वातावरण मन्त्रालयमा सरुवा गरेका छन् ।

यसका साथै आन्तरिक राजश्व विभागका उपमहानिर्देशक अर्जुनप्रसाद भट्टराईको पनि सरुवा भएको छ । भट्टराईलाई सामान्य प्रशासन मन्त्रालयको अतिरिक्त समूहमा फालिएको छ । पुनले विभिन्न मन्त्रालयका तीन जना सहसचिवहरूलाई अर्थ मन्त्रालय भित्र्याएका छन् ।

अर्थ मन्त्रालय भित्रिने सहसचिवहरूमा ढुण्डीप्रसाद निरौला, शिवलाल तिवारी र नारायणप्रसाद सापकोटा रहेका छन् । यद्यपि उनीहरुको जिम्मेवारी भने तोकिएको छैन् । आन्तरिक राजश्वमा कसलाई पठाउने भन्ने बारेमा मोलमोलाई भइरहेको अर्थ मन्त्रालय स्रोतले जनाएको छ ।