समीकरण फेरिएपछि प्रचण्डसँग कांग्रेसको लामो वार्ता, राती सवा ११ बजेसम्म बालुवाटारमै थिए देउवा

१४ चैत, काठमाडौं । सत्ता समीकरण बदलिएपछि नेपाली कांग्रेसका शीर्ष नेता र प्रधानमन्त्री पुष्पकमल दाहाल प्रचण्डबीच मंगलबार राती लामो वार्ता भएको छ । राती १० बजे बालुवाटार छिरेका कांग्रेस सभापति शेरबहादुर देउवासहितको टोली सवा ११ बजेसम्म बालुवाटारमै थियो । 
 
मंगलबार दिउँसो नै प्रधानमन्त्री प्रचण्ड र कांग्रेस नेता एवं राष्ट्रिय सभाका संसदीय दलका नेता कृष्णप्रसाद सिटौलाबीच पनि छलफल भएको थियो । दिउँसो सिटौलाले भेटेर देउवालाई ब्रिफिङ गरेपछि राती प्रचण्ड र देउवा बीच छलफल भएको हो । यसबारे कांग्रेसका नेताहरूले केही नबताए पनि बालुवाटार स्रोतले टीआरसीका विषयमा छलफल भएको जानकारी दिएको छ । 

सभापति देउवा १० बजेको हाराहारीमा बालुवाटार छिरेका थिए । साढे ११.१५ सम्म भित्र नेताहरूबीच के विषयमा कुरा भयो थाहा भएन, देउवा आउनु अघि टीआरसीबारे छलफल गर्न कांग्रेस सभापति आउँदै हुनुहुन्छ भन्ने खबर थियो, स्रोतले भन्यो । बालुवाटारमा प्रचण्ड र देउवा बीच झण्डै डेढ घण्टा छलफल थियो । भेटमा टीआरसी विधेयक र वैशाख १५ गते हुने उपनिर्वाचन लगायतका विषयमा छलफल भएको भनिएको छ । 

मंगलबार दिउँसो नेता सिटौला र प्रधानमन्त्रीबीच छलफल भएपछि सभापति देउवा केही नेतासँग बालुवाटार राती छिरेका थिए । नयाँ गठबन्धन बनेपछि प्रचण्ड र देउवा बीच पहिलो पटक छलफल भएको हो । उनीहरुको भेटलाई अर्थपूर्ण रुपमा हेरिएको छ । सभापति देउवाले प्रधानमन्त्रीसँग भएको छलफलका विषय पदाधिकारी बैठकमा जानकारी गराउने बताइएको छ । 

इलाम २ को उपनिर्वाचनमा उम्मेदवार चयनका विषयमा छलफल गर्न पदाधिकारी बैठक बोलाउने तयारी छ । चैत १८ गते अगाडि उनले पदाधिकारी बैठक बोलाउने तयारी गरेका छन् ।