सरुवामा बेथिति, महतको सेटिङ फालेर पुनले अर्थमा फेरे कर्मचारी

१४ चैत, काठमाडौं । आफू जानुभन्दा अगाडिका कर्मचारी फालेर नयाँलाई ल्यायो भने भनेको मान्छ र ठूलै उपकार गरेको ठान्छ भन्ने सोच मन्त्रीहरूले राख्छन् । मन्त्री भएपछि सके सचिव र नसके सहसचिव मुनिका भएपनि कर्मचारी फेर्नुपर्छ भन्ने मान्यता सबैमा देखिन्छ । अरु परिस्थिति र कामको अवस्था हेरेर कर्मचारी चलाउने परम्परा  भने छैन ।  

धेरै जसो सचिवहरूलाई बेकम्मा बनाएर राख्ने प्रधानमन्त्री कार्यालयपछि धेरै कर्मचारी चलाउनेमा पर्छ, अर्थ मन्त्रालय । अर्थमा जस्तो चाँडो अरूमा कर्मचारी खासै चलाइँदैन । मंसिर ४ को निर्वाचन सकिएपछि डेढ महिना अर्थमन्त्री बनेका एमाले उपाध्यक्ष विष्णु पौडेलले मन्त्रालय छिरेको तीन दिनमै कर्मचारी फेरेका थिए । त्यसपछि अर्थमन्त्री बनेका डा. प्रकाशशरण महतले पौडेलले ल्याएका सबै कर्मचारी फेर । महतले  फेरेका केही बाहेक अरूले केही समय अर्थमा बिताउन पाएका थिए ।   

अर्थमन्त्री हुने बित्तिकै आफूले चिनेको र पार्टीले चिनेको कर्मचारी खोज्ने चलन छ । अहिलेका अर्थमन्त्री वर्षमान पुनले पनि यही सिद्धान्त अपनाएर अर्थ मन्त्रालय र मातहतका विभागमा कर्मचारी फेरेका छन् । उनले महतले ल्याएका कर्मचारीलाई महाशाखा र विभागबाट हटाएर नयाँ लिएर आएका छन् । आफू अनुकूलको टीम बनाउने भन्दै उनले कर्मचारी फेरबदल गरेको जानकारी दिएका छन् । कर्मचारीको भनाइमा यो पटक अर्थका कर्मचारी चलाउनुमा प्रधानमन्त्री पुष्पकमल दाहाल प्रचण्डको पनि इच्छा थियो । 

उनले यसअघि अर्थमा लान चाहेका केही कर्मचारी थिए । नेपाली कांग्रेसका तर्फबाट महत अर्थमन्त्री भएकाले प्रचण्डले दिएको दवाव कतिपय अवस्थामा काम नलागेको अवस्था थियो । पछिपछि हुँदै जाँदा प्रधानमन्त्री र अर्थमन्त्रीबीच सम्बन्ध पनि राम्रो थिएन । तर, अहिले अर्थमन्त्री आफ्नै भएकाले पुनसँग चिनजान नभएपनि केही कर्मचारीले अर्थको राम्रो विभागमा जाने मौका पाएका छन् ।  
     
अर्थमन्त्री वर्षमान पुनले कर्मचारी त फेरे । तर, यसले आगामी बजेटमा कस्तो प्रभाव पार्छ भन्ने आँकलन गर्न सकेको देखिएन । बजेट तयारीको समयमा महाशाखा प्रमुख र विभागका महानिर्देशकको सरुवा घातक मानिन्छ । मन्त्री पुनले बजेट तथा कार्यक्रम महाशाखा प्रमुखमा राजस्व व्यवस्थापन महाशाखा प्रमुख रितेश शाक्यलाई ल्याएका छन् ।

त्यस्तै, मन्त्री पुनले भन्सार विभाग र आन्तरिक राजश्व विभागका महानिर्देशक पनि फेरेका छन् । उनले आन्तरिक राजश्व विभागको महानिर्देशकमा शिवलाल तिवारीलाई पठाएका छन् भने भन्सार विभागको महानिर्देशकमा ढुण्डी निरौलालाई पठाएका छन् । बजेट निर्माणमा जुट्नुपर्ने बेला महत्वपूर्ण मानिएका तीन महाशाखाका सहसचिवहरूको सरुवा गरिएको हो ।

अर्थमन्त्री पुनले सहसचिव रितेश कुमार शाक्यलाई बजेट तथा कार्यक्रम महाशाखा प्रमुख बनाएर ल्याएका छन । उनी पुनको भन्दा पनि प्रधानमन्त्रीको जोडले त्यहाँ पुगेको बताइन्छ । यसअघि उनी मन्त्रालयमा राजश्व व्यवस्थापन महाशाखा प्रमुख थिए । यसअघि बजेट महाशाखाका प्रमुख  रहेका उत्तर कुमार खत्रीलाई योजना अनुगमन तथा मूल्याङ्कन महाशाखामा सरुवा गरिएको छ । मन्त्रालयका प्रवक्ता समेत रहेका अनुगमन मूल्याङ्कन महाशाखाका धनीराम शर्मा राजश्व व्यवस्थापन महाशाखाको प्रमुख बनेका छन् । 

यस अघि आन्तरिक राजस्व विभागका महानिर्देशक रहेका भूपाल बराललाई वातावरण विभागमा र भन्सार विभागका महानिर्देशक शोभाकान्त पौडेललाई सार्वजनिक वित्त व्यवस्थापन तालिम केन्द्रमा सरुवा गरिएको छ । तालिम केन्द्रका प्रमुख रामप्रसाद आचार्यलाई मन्त्रालय तानिएको छ ।

भन्सार विभाग, आन्तरिक राजश्व विभाग र मन्त्रालयको बजेट महाशाखामा पूर्व अर्थमन्त्री डा. प्रकाशशरण महतले आफू निकटका व्यक्तिहरूलाई सेट गरेर नयाँ आर्थिक वर्षको बजेट निर्माण गर्ने सुरसार गरेका थिए । सोही मुख्य जिम्मेवारीमा अर्थमन्त्री पुनले आफ्ना निकटस्थहरुलाई ल्याएका छन् । अब नयाँ आएका कर्मचारीलाई सो विभागको जानकारी लिन महिनौं लाग्ने छ । बजेट बनाउने समय घर्किरहेको छ । संसदमा प्रि-बजेट बारे छलफल चलिरहेको छ । यस्तो बेला अर्थमन्त्री पुनले सेट फेरेका छन् ।