एसपीमा बढुवा सिफारिसमा गृहमन्त्रीको हस्तक्षेप, ओली र प्रचण्डका पीएसओ तान्दा नम्बरमा तलमाथि

१५ चैत, काठमाडौं । प्रहरीको सरुवा बढुवामा हस्तक्षेप नगर्ने भन्दै ठूलो स्वरले खोकेका गृहमन्त्री रवि लामिछानेले डीएसपीहरूको हालै भएको सरुवा र हिजो निकालिएको बढुवामा चरम हस्तक्षेप गर्दा नेपाल प्रहरी थप विवादमा परेको छ । नेपाल प्रहरीका ८ जना डीएसपीलाई एसपीमा बढुवा गर्न सिफारिस गर्दा प्रहरी महानिरीक्षक बसन्तबहादुर कुँवर नेतृत्वमा बनेको बढुवा सिफारिस समिति विवादमा परेको छ । आईजीपी अध्यक्ष रहेको समितिले एसपीमा बढुवा गर्न ८ जनालाई सिफारिस गर्दा पहिलो नम्बरमा रहेका डीएसपी छुटेपछि विवाद भएको हो । 

यो सिफारिसलाई लिएर प्रहरी मुख्यालयमा ठूलै चर्चा चलेको छ । सरुवा बढुवामा हस्तक्षेप नगर्ने दावी गरेका गृहमन्त्री लामिछानेको दवावलाई थेग्न नसक्दा महानिरीक्षक कुँवरले वरीयता मिचेर बढुवाको सिफारिस गरि प्रहरीको चेनअफ कमाण्डलाई असर पार्ने काम गरेको आरोप लगाइएको छ । भर्खरै भएको डीएसपी सरुवामा प्रश्न उठिरहेका बेला ८ जनालाई एसपीमा बढुवा गर्न गरिएको सिफारिसले नेपाल प्रहरी संगठनभित्र थप असन्तुष्टि बढाएको प्रहरीका उच्च अधिकारीहरू बताउँछन् ।      
 
प्रहरीमा जनपद समूहतर्फ ८ जना डीएसपीहरूलाई प्रहरी उपरीक्षक (एसपी)मा बढुवा गर्न हिजाे साँझ सिफारिस गरिएको छ । आईजीपी वसन्तबहादुर कुँवरको अध्यक्षतामा बसेको बढुवा समितिले निकालेको बढुवा सिफारिस सूचीमा एक नम्बर वरीयतामा रहेका डीएसपी प्रदीप बहादुर क्षेत्री बढुवा हुनबाट रोकिएका छन् । यसले गर्दा प्रहरीको जिल्ला सम्हाल्ने तहका अधिकारीहरूलाई असन्तुष्ट बनाउने काम गरेको प्रहरीका एक उच्च अधिकारीले नेपालबहसलाई बताए ।  
 
बढुवा सिफारिसमा परेका डीएसपीहरू ढकेन्द्र खतिवडा, अंगुर जिसी, यादव ढकाल, सन्तोष तामाङ, श्याम बाबु ओलिया, निरन्जन दत्त भट्ट, राजन लिम्बु र विनोद घिमिरे छन् । उनीहरुलाई एसपीमा बढुवा गर्न सिफारिस गरिएको हो । उनीहरू २०७२ साउन १ मा इन्स्पेक्टरबाट डीएसपीमा बढुवा भएका थिए । 

प्रहरीका ती अधिकारीका अनुसार सबै कुरामा अगाडि रहेका क्षेत्री र रञ्जितकारलाई पछाडि पारेर ९ नम्बर वरीयतामा रहेका सन्तोष तामाङ र १२ औँ नम्बरका विनोद घिमिरेलाई बढुवा गर्न सिफारिस गरिएपछि विवाद देखिएको हो । गृहमन्त्री रवि लामिछानेको दवावमा आईजीपी कुँवरले वरियतामा अगाडि रहेका डीएसपीलाई फालेको बताइएको छ । वरियताका आधारमा बढुवा गर्ने कि शक्तिकेन्द्रका निकटलाई बढुवा गर्ने भन्ने विषयले यतिबेला प्रहरी संगठनमा ठूलै खैलाबैला चलेको छ । 

ओली र प्रचण्डका पीएसओ तान्दा नम्बरमा तलमाथि  

प्रहरी प्रधान कार्यालयले १० महिनादेखि रोकिएको एसपी बढुवामा पहिलो नम्बरमा रहेका प्रदीप क्षेत्री नै छुटेका छन् । आठ डीएसपीको एसपीमा बढुवामा सरकारी भागवण्डा मिलाउँदा रोलक्रममा रहेका क्षेत्री छुटेका हुन् । आर्थिक प्रशासन तथा बजेटमा बसेका ढकेन्द्र खतिवडालाई तेस्रो नम्बरबाट पहिलो नम्बरमा ल्याइएको छ भने अन्यायमा परेका अंगुर जीसीलाई दोस्रो नम्बरमै बढुवा गरिएको छ ।  एसपी बढुवामा प्रधानमन्त्री पुष्पकमल दाहाल प्रचण्डका पीएसओ विनोद घिमिरे र केपी ओलीका पीएसओ सन्तोष तामाङ तथा राजन लिम्बुलाई अटाइएको छ । कार्यक्षमताको आधार जिसी अगाडि आउनुपर्नेमा बजेट महाशाखा चलाएका खतिवडालाई अगाडि ल्याइएको छ ।

लिम्बु र तामाङ पूर्वप्रधानमन्त्री एवं एमाले अध्यक्ष केपी शर्मा ओलीका निजी सुरक्षा अधिकृत (पीएसओ) का रुपमा काम गरेका अफिसर हुन् । घिमिरे हालका प्रधानमन्त्री प्रचण्डको पीएसओ बसिसकेका अधिकृत हुन् । यसैगरी नियमित बढुवामा नारायण रन्जितकार छुटाइएको छ । उनी पनि बढुवाको सूचीमा रहेका थिए । एक नारायण कोइराला र अनन्तराम शर्मा भन्दा अघि विनोद घिमिरेलाई बढुवा गरिएको छ ।

गत साउनमा एसपीहरू दानबहादुर मल्ल र वामदेव गौतम अवकाश पाएपछि दुई पद रिक्त भएको थियो । त्यस्तै गत कात्तिक २४ गते पाँच जान एसपीहरू बसन्त रजौरे, रविकुमार पौडेल, नवीन राई, वीरबहादुर ओली र चन्द्रदेव राईलाई एसएसपीमा बढुवा गरेपछि पनि पद रिक्त भएको छ । 

त्यस्तै एसपी रमेश बस्नेतको गत माघ ७ गते एसएसपीमा बढुवा भएसँगै जम्मा रिक्त पद संख्या ८ पुगेको हो । नेपाल प्रहरी ऐन तथा प्रहरी नियमावली अनुसार एसपीको पद रिक्त भएको तीन महिनाभित्रै पदपूर्ति गर्नुपर्ने व्यवस्था छ । ८ एसपी बन्न १२ डीएसपी प्रतिस्पर्धामा थिए । एसपीको प्रतिस्पर्धामा रहेकाहरू ०६१ मा इन्स्पेक्टरबाट प्रहरी सेवामा प्रवेश गरेकाहरू छन् । उनीहरू ०७२ साउन १ गते डीएसपी बनेका थिए । १२ डीएसपी मध्येबाट आठ जना एसपीमा बढुवा भएका छन् भने थप चारजना छुट्ने छन् ।