लम्साल, शर्मा र पौड्यालमध्ये को होला सचिवमा बढुवा ?

१५ चैत, काठमाडौं । बिहीबार बस्ने मन्त्रिपरिषदको बैठकले प्रशासनतर्फ विशिष्ट श्रेणीको रिक्त एक सचिव पदमा बढुवा गर्दैछ । एक पदका लागि तीन जना सहसचिवको नाम सिफारिस भएको छ । 

लोकसेवा आयोगका अध्यक्ष माधवप्रसाद रेग्मी अध्यक्ष रहेको सचिव बढुवा सिफारिस समितिले सहसचिवहरू केदारनाथ शर्मा, हरि लम्साल र लोकनाथ पौड्यालको नाम सिफारिस गरेको छ । 

बिहीबार बस्ने मन्त्रिपरिषद् बैठकले तीन जना मध्येबाट एक जनालाई सचिव बढुवा गर्नेछ । १ नम्बरमा सिफारिस भएका लम्साल सुदूरपश्चिम प्रदेशको मुख्यमन्त्री कार्यालयमा प्रमुख सचिव छन् । दोस्रो नम्बरमा सिफारिस भएका केदारनाथ शर्मा ८ माघदेखि कोशी प्रदेशको मुख्यमन्त्री कार्यालयमा कायममुकायम प्रमुख सचिव छन् । 

तेस्रो नम्बरमा सिफारिस भएका पौड्याल प्रधानमन्त्री तथा मन्त्रिपरिषद्को कार्यालयमा कार्यरत छन् । यी तीनमध्येबाट मन्त्रिपरिषदले एक जनालाई सचिवमा बढुवा गर्नेछ । आज मन्त्रिपरिषदको बैठक बस्दैछ ।