सर्वोच्चले गरिदियो कांग्रेस सांसद गुरुङको निलम्बन फुकुवा

१६ चैत, काठमाडौं । सर्वोच्च अदालतले नेपाली कांग्रेसका सांसद टेकबहादुर गुरुङको निलम्बन फुकुवा गर्न आदेश दिएको छ । शुक्रबार सर्वोच्चका न्यायाधीशद्वय मनोजकुमार शर्मा र विनोद शर्माको इजलासले गुरुङको निलम्बन फुकुवा गरेको हो ।

उनी मनाङबाट प्रतिनिधिसभा सदस्यमा निर्वाचित थिए । गत पुस १२ गते संसद सचिवालयले उनलाई निलम्बन गरेको थियो । प्रतिनिधि सभामा मनाङ जिल्लाबाट निर्वाचित सांसद टेक बहादुर गुरुङलाई निलम्बन गर्ने संसद सचिवालयको सूचना सम्मानित सर्वोच्च अदालतले आज उत्प्रेषणको आदेशद्वारा बदर गरेको हो ।

सांसद गुरुङको तर्फबाट चर्चित कानुन व्यवसायीद्धय हुमबहादुर खत्री र बाबुराम भट्टराईले सर्वोच्चमा रिट दायर र बहस पैरवी गरेका थिए । उनी अब संघीय संसदमा उपस्थित भइ जनताको प्रतिनिधित्व  गर्न पाउने भएको कानुन व्यवसायी हुम बहादुर खत्रीले नेपालबहसलाई बताए।

उनी विरुद्ध अख्तियारले २०७५ माघ २१ गते विशेष अदालतमा मुद्दा दायर गरेको थियो । मुद्दा विचाराधीन भएकोले उक्त मुद्दाको किनारा नभएसम्म स्वतः निलम्बनमा रहने कानुनी व्यवस्था कार्यान्वयन गराउन सम्बन्धित निकायमा लेखि पठाउने भनि अख्तियारले २०७९ पुस ८ गते पत्राचार गरेको थियो ।