वैशाखको पहिलो साता दुई एआईजी घर जाँदै, दुई डीआईजीको बढुवा हुँदै

१८ चैत, काठमाडौं । सरकारले नेपाल प्रहरी ऐन २०१२ प्रतिस्थापन नगर्दै माथिल्लो तहका प्रहरी अधिकारीहरू घर जान लागेका छन् । उमेर हदका कारण उनीहरू अनिवार्य अवकाशका जान लागेका हुन् ।

नेपाल प्रहरीका अतिरिक्त महानिरीक्षक (एआईजी) द्वय सन्दीप भण्डारी र मीरा चौधरी अबको २० दिनपछि अनिवार्य अवकाशको मुखमा पुगेका छन् । उनीहरु एआईजीको उमेर हदका कारण अनिवार्य अवकाशमा जान लागेका हुन् ।  २०५१ चैत ५ गतेदेखि प्रहरी निरीक्षक पदबाट प्रहरी सेवा सुरु गरेका भण्डारी र चौधरी एकसाथ अवकाशमा जान लागेका हुन् ।

उनीहरू वैशाख ५ र ७ गते एआईजीको ५६ वर्षे उमेर हदका कारण अवकाशमा जान लागेका हुन् । प्रहरी नियमावली अनुसार एआईजीको पदावधि ५ वर्ष राखिएको छ भने उमेर हदका आधारमा ५६ वर्षमा अवकाश तोकिएको छ । उनीहरू उमेर हदका आधारमा अवकाशमा जान लागेका हुन् ।

एआईजी भण्डारीको जन्ममिति २०२५ वैशाख ५ र चौधरीको सोही महिनाको ७ गते रहेको छ । उनीहरुबोहक डीआईजी विकाशराज खनालसमेत वैशाख ७ मै अवकाश जाँदैछन । उनी पनि डीआईजीको ५६ वर्षे उमेर हदकै कारण अवकाशमा जान लागेका हुन् । उनको समेत २०२५ वैशाख ७ जन्ममिति छ । एआईजी भण्डारी प्रहरी प्रतिष्ठान महाराजगञ्ज र मीरा प्रशासन विभाग प्रमुख छन् ।

त्यस्तै डीआईजी खनाल गण्डकी प्रदेश प्रहरी प्रमुख छन् । उनीहरुलाई किताबखानाले अवकाशको पत्र पठाइसकेको छ ।  त्यसैगरी डीआईजी सुरेन्द्र प्रसाद मैनाली पनि जेठको पहिलो साता घर जाँदैछन् । उनी जेठ १० गते अनिवार्य अवकाशमा जान लागेका हुन् । एकेडेमीका डीआईजी उमेशराज जोशीले असार १९ गते अवकाश पाउँदैछन् । उपत्यका ट्राफिक प्रहरी कार्यालयका प्रमुख रहेका पोषराज पोखरेलले असार २१ गते अनिवार्य अवकाश पाउँदैछन् ।

वैशाख ७ गते रिक्त रहने दुई एआईजीमा भने जोशी र पोखरेल नियुक्त हुने संभवना रहेको छ । मैनाली तुरुन्तै घर जाने भएकाले उनलाई सरकारले तत्काल एआईजी नबनाउने संभावना रहेको छ । उनी भने एक महिने एआईजीका लागि दौडधुप गरिरहेका छन् ।