छिमेकी नै तर्सने गरी अनामनगरमा रेशम पक्षबाट रञ्जिता पक्षमाथि होहल्ला र कुटपिट

१९ चैत, काठमाडौं । नागरिक उन्मुक्ति पार्टीको काठमाडौं स्थित अनामनगरमा रहेकाे केन्द्रीय कार्यालय हाताभित्रै छिमेकी नै तर्सने गरी होहल्ला र कुटाकुट भएको छ । सुदूरपश्चिम सरकारको विषयलाई लिएर चलिरहेको  छलफलमा रेशम चौधरी पक्षले रञ्जिता श्रेष्ठ चौधरी पक्षका नेतामाथि हात हालेको बताइएको छ । 

उनीहरुको होहल्लाले छिमेकी घरबाहिर र छतमा निस्किएका थिए । यसले रेशम चौधरी दम्पत्ति बीचको विवादबाट नागरिक उन्मुक्ति पार्टी  विभाजन उन्मुख देखिएको छ । अनामनगरस्थित पार्टी केन्द्रीय कार्यालयमा बैठक बसिरहेका बेला नेताहरूबीच हात हालाहाल भएको हो ।

वर्तमान सत्ता गठबन्धनमा सहभागी हुने रन्जिता पक्ष र नहुने रेशम पक्षबीच भएको विवादले कुटाकुटको अवस्था सिर्जना भएको नाउपाका एक नेताले जानकारी दिए । विवादका क्रममा रञ्जिता पक्षका टीकापुरका मेयर रामलाल डगौरा र नेता रमेश विकमाथि हातपात भएको बताइएको छ । 

नाउपाको अध्यक्षमा रेशम चौधरीलाई निर्वाचन आयोगले मान्यता नदिएपछि सो पार्टीमा पछिल्लो समय संस्थापक २१ जना केन्द्रीय सदस्यहरूको बैठक बस्ने गरेको छ । रेशम पक्ष सुदुरपश्चिममा कांग्रेस नेतृत्वको सरकारमा सहभागी छ । रन्जिता पक्ष भने त्यसको विपक्षमा छ । यसै विषयमा विवाद हुँदा हात हालाहालको स्थिति आएको ति नेताले बताए ।