चीनबाट फर्किएका परराष्ट्रमन्त्रीले भने, ‘बीआरआईबारे खास केही भएन, तेस्रो फेजमा टुंगिएला’ ?

१९ चैत, काठमाडौं । उपप्रधानमन्त्री एवं परराष्ट्रमन्त्री नारायणकाजी श्रेष्ठ चीन भ्रमण सकेर नेपाल फर्किएका छन् । उनी सात दिनको भ्रमण पूरा गरी सोमबार बिहान नेपाल आइपुगेका हुन् । चीन भ्रमणका क्रममा बहुचर्चित बीआरआई परियोजना कार्यान्वयनबारे खासै कुरा नभएको संकेत उनले दिएका छन् । 

त्रिभुवन अन्तर्राष्ट्रिय विमानस्थलमा आयोजित पत्रकार सम्मेलनमा उनले आफ्नो भ्रमण सफल भएको बताए । नेपालको केन्द्रीय कार्यभार आर्थिक विकास र समृद्धि भएको भन्दै मन्त्री श्रेष्ठले त्यसका लागि चीनको सहयोग चाहिन्छ भनेर छलफल गरेको जानकारी दिए । उनले त्यसको परिणाम सकारात्मक आउने विश्वास व्यक्त पनि गरे । 

आर्थिक विकासको विषयमा बुँदा बुँदामा छलफल भएको उनको भनाइ छ । उनले बीआरआई कार्यान्वयनमा कुनै समस्या नभए पनि समय लाग्ने बताए । चीनबाट बीआरआई अन्तर्गतको सहयोग अनुदानमा लिने कि ऋणमा लिने भन्ने विषयमा त्यति विवाद नरहेको र यस बारेमा तेस्रो फेजमा मात्रै टुंगो लगाउन सकिने बताए ।
 
नेपालले अनुदानमै सहयोग प्राप्त होस् भन्ने चाहेको पनि उनले धारणा राखे ।  ऋणमा नै भए पनि कुन कुन क्षेत्रमा कसरी लगानी गर्ने भन्ने विषय छनौट गर्ने उनको भनाइ थियो । मानसरोवरमा पर्यटकलाई सहजीकरण गर्न छलफल भएको उनले जानकारी दिए ।  यस्तै दुई देशबीच सिधा बस सेवा सञ्चालन गर्न  सहमति भएको,  नेपालको कृषिको उत्पादकत्व बढाउन चिनिया पक्ष सकारात्मक रहको उनले बताए ।