प्रशिक्षार्थी कर्मचारी नियुक्तिबारे कांग्रेसले माग्यो शिक्षामन्त्रीसँग जवाफ

१९ चैत, काठमाडौं । नेपाली कांग्रेसले शिक्षा, विज्ञान तथा प्रविधिमन्त्री सुमना श्रेष्ठले सरकारी कर्मचारीलाई पन्छाएर प्रशिक्षार्थी कर्मचारी नियुक्ति गर्न खोजेको विषयबारे जवाफ मागेको छ । उसले यसबारे सदनमा आएर मन्त्रीले जवाफ दिनुपर्ने कांग्रेसको माग छ । 

सोमबार प्रतिनिधि सभाको विशेष समयमा बोल्दै सांसद प्रदीप पौडेलले सरकारी कर्मचारीलाई पन्छाएर नयाँ नियुक्ति गरेर नयाँ जिम्मेवारी दिने कोसिस गरिएको खबर आइरहेको भन्दै यी तमाम विषय संसदलाई जानकारी गराइनुपर्ने बताए । हालै शिक्षा, विज्ञान तथा प्रविधि मन्त्रालयले प्रशिक्षार्थी कर्मचारी परिचालन गर्न नयाँ कार्यविधि ल्याएको छ । उक्त कार्यविधिका सन्दर्भमा कांग्रेस सांसद पौडेलले जवाफ माग गरेका हुन् । 

  
यस्तै पौडेलले रुसमा श्रम स्वीकृति खुलाएको भन्दै विरोध गरेका छन् । सांसद पौडेलले रुसमा श्रमिकको रुपमा गएर सेनामा भर्ना गराउन खोजिएको त होइन भन्दै प्रश्न गरेका छन् । रुसमा युद्ध भइरहेको छ, हामी सबैलाई थाहा छ । नेपाल सरकारले नेपाली जनतालाई कडाइका साथ रुस नजान भन्नु पर्ने ठाउँमा  श्रम मन्त्रालयले श्रम स्वीकृति खुलाएको छ । यति नै बेला सरकारले रुसमा श्रम स्वीकृति किन दियो ? यस भित्र गम्भीर स्वार्थ लुकेको हामीले देखेका छन, उनले भने । 

सांसद पौडेलले पञ्चशीलको कुटनीति अपनाउने देशले कुनै मुलुकको सेनामा भर्ती हुन पठाउन मिल्छ भन्दै थप प्रश्न गरे । १८ घण्टा काम गर्दा पनि ४० हजार बढी कमाउन सक्दैन । पैसा कमाइन्छ भन्ने झुटो हो । त्यसैले उनीहरू सेनामा भर्ती हुन जान्छन्, उनले भने । रुसी सेनामा कति नेपाली भर्ना भएका छन्, अवस्था के छ, आफन्त कुन पीडामा छन् भन्ने सरकार बेखबर भएको र खोजी गर्ने चेप्टा समेत नगरेको उनले आरोप लगाए ।