के छ नेपाल वायुसेवा निगमसँग न्यारोबडी जहाज खरिद प्रक्रियामा भ्रष्टाचार नभएको पुष्टि हुने प्रमाण ?

१९ चैत, काठमाडौं । संसदको अन्तर्राष्ट्रिय सम्बन्ध र पर्यटन समितिले नेपाल वायुसेवा निगमसँग जहाज खरिद गर्दा भ्रष्टाचार भएको छैन भने त्यसको पुष्टि हुने कागज पेश निर्देशन दिएको छ । न्यारोबडी जहाज खरिद प्रक्रियामा भ्रष्टाचार नभएको प्रमाणसहित १५ दिनभित्र स्पष्ट जवाफ दिन निगमलाई समितिको  निर्देशन छ । समितिको सोमबार बसेको बैठकमा निगमलाई यस्तो निर्देशन दिएको हो । 

समितिले न्यारोबडी जहाज खरिद प्रक्रिया भ्रष्टाचार जन्य कार्य नभएको समितिलाई विश्वास हुने गरी स्पष्ट जवाफ पेस गर्न निर्देशन दिएको समितिका सभापति राजकिशोर यादवले जानकारी दिए । उनले न्यारोबडी जहाजका विषयमा उपसमिति बनाएर छानबिन गरिने र न्यारोबडी जहाज खरिद सम्झौताको बेलामा भएका सबै प्रक्रियाको बारेमा छानविन गर्ने बताए ।  

सभापति यादवले परिस्थितिजन्य कारणले भ्रष्टाचार भयो भन्ने समितिलाई विश्वास दिलाउन नसके समितिले थप कारबाहीको लागि बाध्य हुने चेतावनी दिए । उनले दुई हप्ता भित्र न्यारोबडी खरिद प्रक्रियामा कुनै बदमासी नभएको विश्वास दिन जरुरी रहेको बताए । उनले युरोपियन युनियनको कालोसूचीबाट हट्नको लागि नागरिक उड्डयन प्राधिकरण र नेपाल वायुसेवा निगमले उचित भूमिका खेल्न नसकेको बताए ।  

यस अघिका पर्यटनमन्त्री सुदन किराँतीको समयमा जहाज खरिद प्रक्रिया अगाडि बढाइएको थियो । जहाज खरिदका लागि प्रक्रिया सुरु गर्दा नै यसमाथि प्रश्न उठेको थियो । त्यतिबेला मन्त्री किरातीले निगमलाई आत्मनिर्भर बनाउन जहाज थप्न आवश्यक रहेको बताएका थिए ।