आयरल्यान्ड वुल्भ्समाथि नेपालको सान्त्वना जित

१९ चैत, काठमाडौं । आयरल्यान्ड वुल्भ्सविरूद्धको तेस्रो टी–२० खेलमा नेपालको ए क्रिकेट टिमले जित निकालेको छ । नेपाल ए ले सोमबार खेलिएको तेस्रो तथा अन्तिम टी–२० क्रिकेटमा 'आयरल्यान्ड ए' लाई तीन रनले हराएको छ । 

जारी शृंखलामा नेपालले यो सान्त्वना जित हासिल गरेको हो । नेपालले दिएको २१४ रनको लक्ष्य पछ्याएको आयरल्यान्डले २० ओभरमा ७ विकेटको क्षतिमा २१० रन बनायो । आयरल्यान्डका ओपनर रोस एडियरले १४ बलमा ३१ रन जोडे भने जेम्स म्याकुलम ४ रन र पिटर मुर २ रनमा आउट भए । 

कप्तान निल रकले २ रन मात्र जोडे । टपिङ ६० रन र डेलनी ६८ रन जोडेर आउट हुँदा नेपाललाई राहत मिलेको थियो । अन्तिम ओभरमा आयरल्यान्डलाई २० रन चाहिदा नेपालका रशिद खानविरुद्ध फिन ह्यान्डले पहिलो बलमा छक्का प्रहार गरेका थिए । त्यसपछि दोस्रो बलमा दुई रन र तेस्रो बलमा पनि दुई रन लिए । चौथो बलमा चौका प्रहार गर्दा उसलाई दुई बलमा ६ रन चाहिएको थियो । पाँचौ बलमा दुई रन लिने क्रममा ह्यान्ड २२ रन जोडेर आउट भए । 

बलिङमा नेपालका विपिन खत्रीले ३ विकेट लिए । उनले ४ ओभरमा १ मेडन राख्दा २३ रन दिए । कमलसिंह ऐरी, रशिद खान र नारायण जोशीले १–१ विकेट लिए । नेपालका लागि आरिफ शेखले उत्कृष्ट ब्याटिङ गर्दै नटआउट ९३ रन जोडे । उनले ४८ बलमा ७ चौका र ६ छक्का प्रहार गरे । 

कमलसिंह ऐरीले ७ बलमा २ चौका र १ छक्का प्रहार गर्दै नटआउट १९ रन जोडे । रशिद खानले १३ बल खेलेर ३ छक्का प्रहार गर्दै २४ रन जोडेका थिए । त्यसअघि ओपनरद्वय लोकेश बम ८ रन र देव खनाल ६ रन जोडेर आउट भए । कप्तान विनोद भण्डारीले ११ रन जोड्दा बसिर अहमदले १९ रन बनाए ।  पवन सर्राफ १३ रन र नारायण जोशी १ रनमा आउट भए ।