प्रस्तावित महालेखा परीक्षकविरुद्ध उजुरी आह्वान

२० चैत, काठमाडौं । संसदीय सुनुवाइ समितिले एक सूचना जारी गर्दै प्रस्तावित महालेखा परीक्षक तोयम रायाविरुद्ध उजुरी आह्वान गरेको छ । सूचना दिने सूचना दाताले आफ्नो नाम, थर, वतन र फोन नम्बर स्पष्ट रूपमा खुलाउनुपर्ने र निजले चाहेमा सूचना दाताको नाम गोप्य राखिने ब्यहोरा सूचनामा उल्लेख छ । 

सोमबार सिंहदरबारमा बसेको संसदीय सुनुवाइ समितिको बैठकले उजुरी आह्वान गर्ने निर्णय गरेको थियो । आइतबार बिहान बसेको संवैधानिक परिषदको बैठकले महालेखा परीक्षकमा तोयम रायालाई सिफारिस गरेको थियो । संवैधानिक परिषदले सिफारिस गरे लगत्तै उनको संसदीय सुनुवाइ प्रक्रिया सुरु भएको हो ।

सूचना प्रथम पटक प्रकाशित भएको मितिले १० दिनभित्र कार्यालय समयमा समितिको सचिवालयमा वा कुनै जिल्ला प्रशासन कार्यालयमा सूचना वा उजुरी दिनु हुन सकिने समितिले उल्लेख गरेको छ ।