प्रधानमन्त्री प्रचण्डले रेशम र रञ्जितालाई भने, ‘श्रीमान-श्रीमती बाँझेको राम्रो देखिएन’

२० चैत, काठमाडौं । प्रधानमन्त्री पुष्पकमल दाहाल प्रचण्डले नागरिक उन्मुक्ति पार्टी (नाउपा) का अध्यक्ष रन्जिता चौधरी र संरक्षक रेशम चौधरीलाई मिलेर अगाडि बढ्न सल्लाह दिएका छन् । उनले राजनीतिमा आउने यस्ता विवाद सामान्य भएको भएको भन्दै दुवै जनालाई मिलेर काम गर्न सुझाव दिएका हुन् । मंगलबार भएका छुट्टाछुट्टै छलफलमा उनले अहिलेको समीकरणलाई सघाउन आग्रह पनि गरे । 

बिहान रञ्जितासँग छलफल गरेका प्रधानमन्त्री प्रचण्डले दिउँसो रेशमसँग छलफल गरेका थिए । छलफल नयाँ सत्ता समीकरण र प्रदेश सरकारका विषयमा केन्द्रित भएपनि प्रचण्डले राजनीतिमा श्रीमान र श्रीमती बीचको विवादलाई सामान्य मान्नुपर्ने बताएका थिए । रेशम र रञ्जिता बीच विवाद हुँदा नाउपा वर्तमान सत्ता गठबन्धनमा आबद्ध छैन भने नयाँ सत्ता समीकरण अनुसार सुदूरपश्चिम र लुम्बिनी प्रदेश सरकार गठनमा अन्योल छ ।

सत्ता समीकरण फेरिएसँगै पार्टी अध्यक्ष रञ्जिता र संरक्षक रेशमबीच विवाद बढ्दा नाउपा विभाजनको डिलमा छ । रञ्जिताले वर्तमान सत्ता गठबन्धनलाई समर्थन गरे पनि उनका पति रेशम त्यसको विपक्षमा छन् । यही विवादको क्रममा सोमबार पार्टी केन्द्रीय कार्यालय अनामनगरमा रन्जिता र रेशम पक्षका नेताहरूबीच कुटाकुट भएको थियो । कुटपिटमा संलग्न भएको भन्दै रञ्जिताले नाउपा गण्डकी प्रदेशका अध्यक्ष राजन गुरुङ र बागमती प्रदेशका अध्यक्ष दीपबहादुर योञ्जन तामाङलाई पार्टीबाटै निष्कासन गरेकी छन् ।

संरक्षक चौधरीले प्रधानमन्त्री प्रचण्डले छलफलका लागि बोलाएपछि आफू गएको बताए । उनका अनुसार प्रधानमन्त्री प्रचण्डले सरकारमा आउन र नयाँ समीकरण अनुसारको सरकारलाई समर्थन गर्न आग्रह गरेका थिए । उनले २३ र २४ चैतमा आफूले पार्टीको बैठक बोलाएको र बैठकले जे निर्णय गर्छ त्यसैअनुसार हुने बताएको जानकारी दिए । उनले प्रदेश सरकारलाई स्वायत्त भएर निर्णय गर्न दिन पनि आफूले प्रधानमन्त्रीलाई भनेको बताए ।