हत्या अभियोगमा माओवादी नेता कालीबहादुर खाम पक्राउ

२० चैत, काठमाडौं । नेपाल प्रहरीले हत्या अभियोग लागेका नेकपा माओवादीका नेता कालीबहादुर खामलाई पक्राउ गरेको छ । उनलाई कोटेश्वरका व्यापारी रामहरि श्रेष्ठको अपहरणपछि हत्या गरेको अभियोगमा पक्राउ गरिएको प्रहरीले जनाएको छ । 

खामलाई रामहरि हत्या प्रकरणका प्रमुख योजनाकार मानिन्छ । बिगत लामाे समयदेखि उनी फरार थिए । यही प्रकरणमा पक्राउ परेका अर्का माओवादीका कमाण्डर गोविन्दबहादुर बटाला रिहा भइसकेका छन् । खामलाई पक्राउ गरिएको एसपी नवराज अधिकारीले पुष्टि गरेका छन् । 

माओवादी शान्ति प्रक्रियामा आएपछि चितवनको शक्तिखोरमा रहेको तेस्रो डिभिजनले कोटेश्वरस्थित रामहरि श्रेष्ठको घरमा सम्पर्क कार्यालय खोलेको थियो। सोही कार्यालयबाट २०६४ चैत १४ गते १७ लाख रुपैयाँ र एउटा पेस्तोल चोरी भएको थियो। घटना छानबिनका लागि भन्दै माओवादीका गोविन्दबहादुर बटाला, केशव अधिकारी र गंगाराम थापा, अर्जुन कार्कीलगायतको टोलीले श्रेष्ठलाई चितवन लगेर हत्या गरेको अभियोग छ।