काठमाडौं महानगरभित्रका निजी विद्यालयलाई नेपाली नामकरण गर्न ७ दिनको समय

२१ चैत्र, काठमाडौं । काठमाडौं महानगरपालिकाले महानगरभित्रका निजी विद्यालयहरूलाई आफ्नो नाम नेपालीमा नामाकरण गर्न ७ दिनको समय दिएको छ । तोकिएको समयभित्र नामाकरण नगरे उनीहरुले नयाँ शैक्षिक सत्रमा विद्यार्थी भर्ना रोक लगाइने चेतावनी दिएको छ ।

काठमाडौं महानगरपालिका शिक्षा विभागले एक सूचना जारी गरी शिक्षा नियमावली, २०५९ (संशोधनसहित) को नियम १५४ (१) तथा काठमाडौं महानगरपालिका विद्यालय शिक्षा व्यवस्थापन नियमावली, २०७४ को नियम ७० मा नेपालीपन झल्कने गरी विद्यालयको नामकरण गर्नुपर्ने व्यवस्था रहेको भन्दै सोही अनुसार गर्न भनेको छ । 

महानगरपालिकाका अधिकांश विद्यालयहरूको नाम अंग्रेजीमा छ । यो व्यवस्थाको प्रतिकूल देखिएकोले त्यस्ता संस्थागत विद्यालयहरूले यो सूचना प्रकाशित भएको मितिले ७ (सात) दिनभित्र यस विभागमा अनिवार्य सम्पर्क गर्नुहुन सूचित गरिन्छ । यस अवधि ( ७ दिन) मा सम्पर्क गरी मौलिक नामाकरणको प्रक्रिया अगाडि नबढाएमा विद्यार्थी भर्ती प्रक्रियामा रोक लगाउनेसहित कानुनबमोजिमको कारबाही प्रक्रिया अगाडि बढाइनेछ,’ सूचनामा उल्लेख छ ।

विद्यालयको मौलिक नामकरणका लागि विद्यालय व्यवस्थापन समितिबाट प्रस्तावित नाम निर्णय गराएर सूचना प्रकाशित भएको मितिले ३५ दिनभित्र विभागमा निवेदन दिनुपर्नेछ । ’अन्यथा यसै सूचनालाई आधार मानी शिक्षा नियमावली, २०५९ (संशोधन सहित) काठमाडौं महानगरपालिका विद्यालय शिक्षा व्यवस्थापन नियमावली, २०७४ तथा प्रचलित कानुन बमोजिम आवश्यक प्रक्रिया अगाडि बढाइने व्यहोरा समेत जानकारी गराइन्छ,’ महानगरको सूचनामा छ ।