विश्वासको मत लिएपछि एमालेलाई सत्ता हस्तान्तरण गर्ने

२१ चैत, सुर्खेत । कर्णाली प्रदेशका मुख्यमन्त्री राजकुमार शर्माले आफूले विश्वासको मत लिएपछि केन्द्रको सहमति अनुसार नेकपा एमालेलाई सत्ता हस्तान्तरण गर्न राजीनामा दिने भएका छन् । उनले बुधबार विश्वासको मत लिँदैछन् । नेकपा माओवादी कर्णाली प्रदेश संसदीय दलको बैठकले मुख्यमन्त्री शर्माले विश्वासको मत लिने निर्णय गरेको थियो ।

प्रदेशसभामा आज ३ बजेको बैठकमा मुख्यमन्त्री शर्माले विश्वास मत लिने कार्यक्रम छ । मुख्यमन्त्री शर्माले विश्वासको मत लिएपछि एमालेलाई सत्ता हस्तान्तरण गर्न राजीनामा दिने माओवादी संसदीय दलका प्रमुख सचेतक रणसिंह परियारले बताए ।

संसदीय दलमा विश्वासको मत लिने छलफल भएको छ परियारले भने,‘नेतृत्वहरुको बीचमा बसाइँ भइरहेको छ । नेतृत्वले के सहमति गर्नुहुन्छ । संसदीय दललाई जानकारी गराउनु हुन्छ । त्यहीँ अनुसार अगाडि बढ्छौ ।’ एमालेले केन्द्रमा भएको निर्णय कर्णालीमा पनि लागू गर्नुपर्ने बताउँदै आएको छ ।