पार्टीको सदस्यता नत्याग्ने शिक्षकलाई कारबाही गरिने

२१ चैत, काठमाडौं ।  शिक्षा, विज्ञान तथा प्रविधि मन्त्रालयले शिक्षण पेशामा आबद्ध रहेर राजनीतिक दलको सदस्यता नत्याग्ने शिक्षकलाई कारबाही गर्ने भएको छ । शिक्षा ऐन र राजनीतिक दल सम्बन्धी ऐनमा शिक्षकले राजनीतिक दलको सदस्यता लिन नपाउने व्यवस्था छ । सोही ऐनको आधारमा रहेर मन्त्रालयले राजनीतिक दलमा आबद्ध शिक्षकलाई कारबाही गर्ने तयारी गरेको हो ।

राजनीति दल सम्बन्धी ऐनमा ‘नेपाल सरकार, प्रदेश सरकार वा स्थानीय तहको स्वामित्वमा नियन्त्रणमा रहेका स्वशासित संस्थाको बहालवाला प्राध्यापक, शिक्षक वा कर्मचारीको पदमा बहाल’ व्यक्ति पार्टी सदस्य हुन नपाउने व्यवस्था छ । उक्त ऐनका आधारमा शिक्षकले राजनीतिक दलको सदस्यता लिन पाउँदैनन् । यद्यपि अधिकांश दलका शिक्षक संगठनमा दलको सदस्यता लिएकाहरू छन् । उनीहरुले सदस्यता नत्यागे कारवाही गरिने भएको हो ।