नाउपाकी समानुपातिक सांसद इन्दिरा गिरीलाई पदमुक्त गर्न सभामुखलाई रञ्जिताको पत्र

२१ चैत, धनगढी । नागरिक उन्मुक्ति पार्टी (नाउपा) की अध्यक्ष रञ्जिता श्रेष्ठले सुदूरपश्चिम प्रदेशसभा सदस्य इन्दिरा गिरीलाई सांसद पदबाट मुक्त गरेको भन्दै सभामुखलाई पत्र पठाएकी छन् । उनले गिरीलाई सांसद नरहने गरी पार्टीले कारबाही गरेको जानकारी गराएकी छन् । 

अध्यक्ष श्रेष्ठले समानुपातिक सांसद गिरीलाई पदमुक्त गरेको पत्र प्रदेश सभामा पठाएकी हुन् । पार्टीको निर्णय विपरीत सरकारमा किन गएको भनेर स्पष्टीकरण सोध्दा पनि जवाफ नदिएकाले हटाउने निर्णय लिएको श्रेष्ठले जानकारी दिइन् ।

रेशम चौधरी पक्षले मुख्यमन्त्री कमलबहादुर शाह सरकारमा मन्त्री पठाएको थियो । लगत्तै रञ्जिताले सरकारबाट तत्काल फिर्ता आउन संसदीय दलका नेता घनश्याम चौधरीलाई निर्देशन दिएकी थिइन् । नागरिक उन्मुक्ति पार्टीका ७ मध्ये ५ सांसद प्रदेश सरकारमा छन् । गिरी कृषि राज्यमन्त्री छन् । अरु सांसद प्रत्यक्ष निर्वाचित हुन् । नाउपाका ७ प्रदेश सांसदमध्ये गिरी र टीका थापा मात्र समानुपातिक हुन् ।

सत्ता समीकरण बदलिएपछि नाउपाको विवाद उत्कर्षमा पुगेको छ । संस्थापक अध्यक्ष रशम चौधरी र रञ्जिताबीच निकै ठूलो विवाद देखिएको छ । यो विवादलाई लिएर नाउपामा विभाजन आउने सम्भावना बढ्दै गएको छ ।