सर्वोच्चबाट खामको मुद्दाको मिसिल झिकाउन चितवन जिल्ला अदालतको आदेश

२१ चैत, काठमाडौं । चितवन जिल्ला अदालतले व्यापारी रामहरी श्रेष्ठको हत्या अभियोगमा पक्राउ परेका माओवादी पूर्वकमाण्डर कालीबहादुर खामको मुद्दाको मिसिल सर्वोच्चबाट झिकाउन आदेश गरेका छन् ।

खामलाई मंगलबार प्रहरीले काठमाडौंको ठमेलबाट पक्राउ गरेर चितवन ल्याइएको थियो । उनलाई अदालत उपस्थित गराएर लामो समयदेखि मुल्तबीमा रहेको मुद्दा अगाडि बढाइएको छ । श्रेष्ठको हत्यामा मुछिएका गोविन्द बहादुर बटालालाई सर्वोच्चले सफाइ दिने फैसला गरेपछि त्यसको पुनरावेदनका लागि मिसिल सर्वोच्च पुगेको थियो ।

सर्वोच्चबाट सक्कल मिसिल प्राप्त भएपछि खामलाई अदालतमा उपस्थित गराउन न्यायाधीश ढकालले आदेश गरेका छन् । आदेशपछि खामलाई पुनः प्रहरीको जिम्मा लगाइएको श्रेष्तेदार विष्णुप्रसाद आचार्यले जानकारी दिए ।