दुबै समूहको अडानले कांग्रेसले सकेन उम्मेदवार छान्न

२१ चैत, काठमाडौं । दुई समूहले अडान नछाडेपछि नेपाली कांग्रेसले आज पनि उम्मेदवार छान्न सकेन । इलाम–२ र बझाङ प्रदेशसभा १ मा हुने उपनिर्वाचनको उम्मेदवार छान्न बुधबार संसदीय बोर्डको बैठक बसेको थियो । सभापति शेरबहादुर देउवाले इलाम–२ मा डम्बर खड्कालाई उम्मेदवार बनाउन प्रस्ताव गरेको थिए । 

शेखर कोइरालासहितका नेताहरूले डम्बरलाई नभई भेषराज आचार्यलाई दिनुपर्ने भनेपछि बैठक निर्णय नगरी सकिएको हो । अर्को बैठक बिहीबार बिहान ९ बजे बस्नेछ । बुधबारको बैठकमा सभापति देउवाले ४ मंसिर २०७९ मा भएको निर्वाचनमा एमालेका सुवासचन्द्र नेम्वाङसँग ११४ मतान्तरले मात्र पराजित भएकाले खड्कालाई नै टिकट दिएर न्याय गर्नुुपर्ने बताएका थिए । 

शेखर कोइरालालगायतका नेताले भने इलाम–२ को पार्टी संरचनामा भेषराज लोकप्रिय भएकाले चुनाव जित्न उनैलाई टिकट दिनुपर्ने अडान राखेका थिए । दुबै पक्ष अडानबाट पछि नहटेपछि बैठक बिहीबार विहान ९ बजेका लागि सारिएको हो । बिहीबारको बैठकमा उम्मेदवारका आकांक्षीहरुलाई पनि बोलाइएको छ ।