सहमति नभएपछि उम्मेदवारका आकांक्षी राखेर देउवा निवासमा कांग्रेसको छलफल

२२ चैत, काठमाडौं । इलाम र बझाङमा हुन गइरहेको उपनिर्वाचनमा कसलाई उम्मेदवार बनाउने भन्ने विषयमा तीन दिनदेखि छलफलमा जुटेको नेपाली कांग्रेसमा सहमति हुन नसकेपछि अहिले उम्मेदवारका आकांक्षीलाई सँगै राखेर शीर्ष नेताहरूले छलफल गरिरहेका छन् । सभापति शेरबहादुर देउवाको निवास बूढानीलकण्ठमा अहिले उम्मेदवारका आकांक्षीबीच छलफल जारी छ । 

पार्टीका मुख्यसचिव कृष्णप्रसाद पौडेलले दिएकाे जानकारीका अनुसार बिहान नेताहरूबीच एकचरण छलफल भएको थियो । तर, सहमति नभएपछि उम्मेदवारका आकांक्षीलाई साथमै राखेर छलफल भइरहेको छ । सम्भवतः आज उम्मेदवार फाइनल हुन्छ । मंगलबार र बुधबार बसेको बैठकमा संस्थापन पक्ष र इतर पक्षबीचको अडान कायम रहँदा कांग्रेसले उम्मेदवार चयन गर्न सकेको छैन ।

बुधबार संसदीय बोर्डको बैठकमा सभापति शेरबहादुर देउवाले इलाम–२ मा डम्बर खड्कालाई उम्मेदवार बनाउन प्रस्ताव गरेका थिए । शेखर कोइराला समूहका तर्फबाट भेषराज आचार्यलाई उम्मेदवारी बनाउनुपर्ने अडान कायमै राखेपछि सहमति भएन । क्षेत्रीय कार्यसमितिको बैठकले भेषराज आचार्य, केशव थापा, डम्बर खड्का, नगेन्द्र कुमाल, रमेश लिङ्देन,चन्द्रमाया लिम्बू र शान्तिकला तामाङको नाम सिफारिस गरेको थियो । अहिले उनीहरू बैठकमा उपस्थित छन् । 

उनीहरूबीच छलफल गरेपछि आज दिउँसो बस्ने कार्यसम्पादन समितिको बैठकले उपनिर्वाचनको उम्मेदवार तय गर्ने पौडेलले जानकारी दिए । आगामी वैशाख १५ गते प्रतिनिधिसभामा इलाम–२ र प्रदेशसभामा बझाङ– १ मा उपनिर्वाचन हुँदैछ ।