छात्रवृत्ति कोटा निर्धारण गरेर मात्र विद्यार्थी भर्ना गर्न लगाउन स्थानीय तहलाई शिक्षाको आग्रह

२३ चैत, काठमाडौं । शिक्षा, विज्ञान तथा प्रविधि मन्त्रालयले निजी विद्यालयमा छात्रवृत्तिको कोटा निर्धारण गरेर मात्रै विद्यार्थी भर्ना गर्ने व्यवस्था मिलाउन स्थानीय तहहरूलाई निर्देशन दिएको छ । विद्यार्थी भर्ना गर्ने समयमा नै छात्रवृत्तिको संख्या छुट्याइ छात्रवृत्ति प्राप्त गर्ने बालबालिकालाई निःशुल्क भर्नाको व्यवस्था मिलाउन मन्त्रालयले स्थानीय तहलाई पत्र पठाएको छ । 

मन्त्रालयका अनुसार विद्यार्थी भर्ना भइसकेपछि कोटा छुट्याउँदा विपन्न र सीमान्तकृत समुदायका बालबालिका छात्रवृत्तिबाट वञ्चित हुँदै आएको गुनासो आइरहेको अवस्थामा समयमा नै यसबारे निर्णय गरी लागु गराउन परिपत्र गरिएको हो । भर्नापछि छात्रवृत्ति दिने प्रवृत्तिले शुल्क तिर्न नसकी भर्ना नहुने अवस्था सिर्जना हुने र छात्रवृत्तिको पहुँच बाहिर हुने स्थिति अन्त्यका लागि मन्त्रालयले स्थानीय तहलाई भनेको हो । 

मन्त्रालयले प्रत्येक शैक्षिक सत्रमा लिने शुल्कको प्रस्ताव स्थानीय तहमा पेश गरी स्थानीय तहबाट विद्यालयको शुल्क निर्धारण गर्नुपर्ने कानुनी व्यवस्था भएको जनाएको छ । यस अनुसार मापदण्ड निर्धारण गरी सम्बन्धित स्थानीय तह र विद्यालयको वेबसाइटमार्फत शुल्क सार्वजनिक गर्न मन्त्रालयले आग्रह गरेको छ । नयाँ शैक्षिक सत्र सुरु हुने लागेको समयमा मन्त्रालयले स्थानीय तहलाई सम्झाएको हो ।