सुनसरीको भुटाहामा दुई पक्षबीचको झडप नियन्त्रण गर्न प्रहरीले चलायो गोली

२३ चैत, विराटनगर । सुनसरीको हरिनगर गाउँपालिका– १ भुटाहामा दुई समूहबीच भएको झडपलाई नियन्त्रणमा लिन प्रहरीले हवाई फायर गरेको छ । झडप नियन्त्रण गर्न प्रहरीले ६ राउण्ड हवाइ फायर गरेको जनाएको छ । निशेधाज्ञा लगाएकै समयमा युवक कुटपिटको विषयलाई लिएर झडप भएको हो । 

प्रहरीकाअनुसार १ भुटाहामा एक युवकलाई निर्घात कुटपिट गरेको घटनाले उग्ररूप लिएपछि ६ राउण्ड हवाइ फायर र ११ राउण्ड अश्रूग्यास प्रहार गरिएको छ । दुई समूहबीच झडप भएपछि स्थानीय प्रशासनले अनिश्चितकालीन निषेधाज्ञा जारी गरेको छ । 

कोशी प्रदेश प्रहरी प्रवक्ता प्रहरी उपरीक्षक दीपक सिग्देलले दुई समूहबीचको झडपलाई नियन्त्रणमा लिने क्रममा ६ राउण्ड हवाइ फायर गरेको बताए । उनका अनुसार दुई पक्षबीचको झडपमा चार जना सामान्य घाइते भएका छन् । घाइतेलाई उपचारका लागि विराटनगर ल्याइएको छ ।

गाउँपालिका भवन क्षेत्रमा २ हजार देखि २५ सय हाराहारीमा मानिसहरू जम्मा भएका छन्। हाल सो क्षेत्रमा सशस्त्र र नेपाल प्रहरी गरी ५ सय भन्दा बढी सुरक्षाकर्मी परिचालन गरिएको छ । सुनसरीका सहायक प्रमुख जिल्ला अधिकारी ओमप्रसाद भट्टराईले झडपको स्थीति र सम्भावित दुर्घटनालाइ नियन्त्रण लिनका लागि थप जनशक्ति परिचालन गरिने जानकारी दिएका छन् ।