चितवन जिल्ला अदालतले दियो खामलाई पुर्पक्षका लागि थुनामा पठाउन आदेश

२३ चैत, चितवन । नेकपा माओवादीका केन्द्रीय सदस्य तथा पूर्वलडाकु कमाण्डर कालीबहादुर खामलाई जिल्ला अदालत चितवनले थुनामा पठाउन आदेश दिएको छ । कोटेश्वरका व्यापारी रामहरि श्रेष्ठको हत्याको अभियोगमा पक्राउ परेका खामलाई पुर्पक्षका लागि थुनामा पठाउन आदेश भएको हो । 

जिल्ला अदालत चितवनका स्रेस्तेदार विष्णुप्रसाद आचार्यका अनुसार जिल्ला न्यायाधीश दयाराम ढकालको इजलासले तथ्य प्रमाणहरुको आधारमा अहिले नै घटनामा कालीबहादुर खामको संलग्नता नरहेको भन्न नसकिने अवस्था रहेको भन्दै  पुर्पक्षका लागि  थुनामा पठाउन आदेश दिएको हो । उनी १५ वर्षदेखि फरार थिए । खामलाई प्रहरीले मंगलबार काठमाडौंको ठमेलबाट पक्राउ गरी बुधबार चितवन पुर्याएको थियो । 

खामको अभियोगका विषयमा बुधबार थुनछेक बहस भएको थियो । सर्वोच्च अदालतबाट बुधबार साँझ मिसिल झिकाएपछि खामको बयान लिइएको थियो । सरकारी तथा वादीका तर्फबाट ३ जना र प्रतिवादीका तर्फबाट ९ जना कानुन व्यवसायीले बहस गरेका थिए ।

शक्तिखोर स्थित तत्कालीन माओवादी लडाकूको तेस्रो डिभिजनका कमाण्डर रहेका बेला खामले कोटेश्वरका व्यापारी श्रेष्ठलाई घरबाट नै उठाएर ल्याउन आदेश दिएका थिए । डिभिजनमा नै कुटेर खामसहित लडाकुहरुले श्रेष्ठको हत्या गरेको अभियोग लागेको छ ।