बसको ठक्करबाट बारामा एक ट्राफिक प्रहरीको मृत्यु

२४ चैत, काठमाडौं । बारामा बसको ठक्करबाट एक ट्राफिक प्रहरी जवानको मृत्यु भएको छ । पूर्व पश्चिम राजमार्ग अन्तर्गत बाराको जीतपुर सिमरा उपमहानगरपालिस्थित अमलेखगन्ज चोकमा ड्युटीमा खटिएका ट्राफिक प्रहरीको मृत्यु भएको हो । 

शुक्रबार राति काठमाडौंबाट काँकडभिट्टा जाँदै गरेको बागमती प्रदेश ०१–००ख ६१२३ नम्बरको बसको ठक्करबाट अमलेखगन्जमा कार्यरत ट्राफिक प्रहरी जवान २९ वर्षीय मुनटुन यादवको मृत्यु भएको जिल्ला प्रहरी कार्यालय बाराका प्रहरी निरीक्षक वीरेन्द्र गुरुङले जानकारी दिए । 

ठक्कर दिने बसका चालकलाई प्रहरीले पक्राउ गरेको छ । उनले बसको ब्रेक नलागेका कारण यादवलाई ठोक्किएको बयान दिएका छन् । मृतक यादवको शव पोस्टमार्टमको लागि वीरगन्जस्थित नारायणी अस्पतालमा राखिएको इन्स्पेक्टर गुरुङले जानकारी दिए ।