सर्वोच्चमा तीन जना न्यायाधीश नियुक्ति गरिँदै

२४ चैत्र, काठमाडौं । प्रधानन्यायाधीश विश्वम्भर प्रसाद श्रेष्ठले न्यायाधीश शुष्मलता माथेमा र आनन्द मोहन भट्टराई विदामा बस्नुभन्दा अगाडि नै सर्वोच्च अदालतमा तीन जना न्यायाधीश नियुक्तिको तयारी गरेका छन् । भट्टराईको अवकाश हुने समय नजिकिँदै छ । ६५ वर्षे उमेरहदका कारण दुईजना न्यायाधीश अवकाश लिने तयारीमा छन् । न्यायाधीश नियुक्तिबारे छलफल गर्न आइतबार न्यायपरिषदको बैठक बस्न सक्ने सर्वोच्च प्रशासनका एक कर्मचारीले नेपालबहसलाई जानकारी दिए । 

प्रधानन्यायाधीश श्रेष्ठ चाँडै न्यायाधीश नियुक्त गरेर सर्वोच्चमा न्यायाधीशको संख्या पूर्ण बनाउने पक्षमा छन् । अब सर्वोच्चमा ल्याइने दुई जना उच्च अदालतका मुख्य न्यायाधीश छन भने एक जना कानुन व्यवसायीबाट ल्याइने छ । उच्च अदालतबाट सर्वोच्चको न्यायाधीशमा कसलाई तान्ने भन्ने लगभग पक्का भइसकेको छ । उनले चैतभित्रै न्यायाधीश सिफारिस भइसक्ने सम्भावना औंल्याएका छन् । सर्वोच्चमा मुद्दाको चाप बढ्दै जानु र समयमा छिन्न नसक्नुको एउटा कारण न्यायाधीश कम भएको भन्दै प्रधानन्यायाधीश श्रेष्ठले नियुक्तिमा जोड दिएका हुन् । 

न्यायपरिषदको सिफारिस बमोजिम गत पुस ४ गते सर्वोच्च अदालतमा डेढ वर्षदेखि रिक्त न्यायाधीश पदमा नियुक्ति गरिएको थियो । त्यसबेला एक महिलासहित ६ न्यायाधीश नियुक्ति गरिए पनि पनि एक पद बाँकी राखिएको थियो । एक व्यक्तिका बारे प्रधानन्यायाधीश र तत्कालीन कानुन मन्त्री धनराज गुरुङबीच सहमति नहुँदा एक पद रिक्त राखेर अरूमा सिफारिस गरिएको थियो । सर्वोच्चमा कार्यरत न्यायाधीश सुष्मालता माथेमाको वैशाखमा र जेठमा न्यायाधीश आनन्दमोहन भट्टराईको कार्यकाल सकिँदैछ ।