सुनसरीमा सम्प्रदायबीच आपसी एकता कायम राख्न सर्वपक्षीय अपील

२४ चैत्र, सुनसरी । सुनसरीमा हिंसा भड्कन नदिन सार्वजनिक अपील गरिएको छ । सुनसरी प्रशासनले सर्वपक्षीय छलफल गरेपछि अपील जारी भएको हो । हरिनगर र देवानगञ्जमा दुई पक्षबीच उत्पन्न विवाद समाधानका लागि जनप्रतिनिधि, सामाजिक र धार्मिक क्षेत्रका अगुवाहरूले संयुक्तरुपमा अपिल गरेका छन् । 

जिल्ला सुरक्षा समितीका पदाधिकारीसहित बसेको सर्वपक्षीय बैठकले घटनाका बारेमा विभिन्न सामाजिक सञ्जालहरूमा भ्रामक किसिमका धार्मिक, सांस्कृतिक तथा जातीय तथा सामाजिक सद्भावमा खलल पु¥याउने किसिमका अभिव्यक्ति तथा सामाग्रीहरू सामाजिक सञ्जालहरूमा पोष्ट नगर्न आग्रह गरेको छ ।

यदि यस्तो गरेको पाइएमा जो कोहीलाई कानून अनुसार कारबाही गरिने निर्णय समेत गरेको छ । दुई पक्षबीचको झडपले अवस्था तनावग्रस्त बनेपछि ५ स्थानीय तहमा शुक्रबार साँझ ५ बजेदेखि लगायएको कर्फ्यु अहिले पनि जारी छ । अवस्था सामान्य नबनेसम्म कर्फ्यु नहट्ने प्रमुख जिल्ला अधिकारी जयनारायण आचार्यले जानकार गिराए । 

जिल्ला प्रशासन कार्यालयमा बिहान भएको सर्वपक्षीय बैठकपछि स्थानीय तहका प्रमुख, प्रदेश सभाका सदस्य तथा विभिन्न धार्मिक र जातीय संस्थाका अगुवाहरूले अपिल जारी गरेका हुन् । शुत्रबारबाट सुनसरीको ५ वटा पालिकाहरूमा कर्फ्यु जारी रहेको छ । बैठकमा आएका सवैले समस्या समाधानमा सबै एकजुट भएर लाग्ने प्रतिबद्धता समेत जनाएका छन् । 

अपिलमा केही अराजक तत्वले सामाजिक सद्भाव बिथोल्न खोजेको भन्दै खेद व्यक्त गरिएको छ । यस्तै, सबै धर्म एवं सम्प्रदायबीच आपसी एकता, सद्भाव कायम राख्ने महान् कार्यमा जुट्न उनीहरुले आग्रह समेत गरेका छन् । घटनाको सत्यतथ्य छानविन गरी दोषीलाई कारबाही गरिने समेत प्रतिबद्धता जनाइएको छ ।