काठमाडौं महानगरभित्र आजदेखि गरिब घरपरिवारको गणना सुरु, २०९ जना गणक परिचालन

२५ चैत, काठमाडौं । काठमाडौं महानगरपालिकाले आज आइतबारबाट गरिब घर परिवारको पहिचानका लागि गणक खटाएको छ ।  २०९ जना गणकले महानगरभित्र रहेका गरिब घर परिवारको पहिचान गरी रिपोर्ट प्रस्तुत गर्ने छ । महानगरका अनुसार गरिब परिवारलाई सरकारी सेवा सुविधा उपलब्ध गराउने सरकारको नीतिअनुसार गरिब पहिचान गर्न लागिएको हो । 

महानगरले बताए अनुसार सरकारले ४९ जिल्लामा गरिब घरपरिवारको परिचयपत्र बाँडिसकेको छ भने १५ जिल्लामा परिचय पत्र बाँड्ने तयारी भइरहेको छ । बाँकी १३ जिल्लाका काठमाडौं महानगर बाहेक सबै पालिकामा गरिब घरपरिवारको गणना सम्पन्न भइसकेको छ । काठमाडौं महानगरपालिका भित्र गणना सकिएपछि देशभरकै गरिब परिवारको गणना सम्पन्न हुने छ ।

गरिब तथ्यांक संकलनको काम २०७० सालमा २३ वटा जिल्लाबाट सुरु गरिएको थियो । हरेक ५ वर्षमा गरिब परिचय पत्र नवीकरण गराउनुपर्ने कानुनी व्यवस्था भए पनि अहिलेसम्म कसैको पनि नवीकरण गरिएको छैन । यसका लगि महानगरले गरिब पहिचान गर्न २०९ जना गणक र २१ जना सुपरीवेक्षक खटाएको छ । उनीहरुलाई महानगरपालिकाले तालिम दिएर पठाएको हो ।