केही नेपाल ऐन संशोधनसम्बन्धी विधेयकमाथि छलफल गर्न समितिले बोलायो ६ जना मन्त्री

२५ चैत, काठमाडौं । प्रतिनिधिसभाको एउटा समितिले आइतबार एकैपटक ६ जना मन्त्रीलाई बोलाएको छ । कानुन, न्याय र मानवअधिकार समितिले विधेयकमाथि छलफल गर्न भन्दै सरकारका ६ जना मन्त्रीलाई बैठकमा बोलाएको छ । 
 
समितिका सभापति विमला सुवेदीले समितिमा ६ जना मन्त्रीलाई डाकिएको बताइन् । समितिमा केही नेपाल ऐनलाई संशोधन गर्न बनेको विधेयकमाथि छलफल छ । समितिले विधेयकमाथिको छलफलका लागि कानुन, न्याय र संसदीय मामिला मन्त्री पदम गिरी, सञ्चार तथा सूचना प्रविधि मन्त्री रेखा शर्मा, श्रम रोजगार तथा सामाजिक सुरक्षा मन्त्री डोलप्रसाद अर्याललाई बोलाएको छ ।

यस्तै भौतिक पूर्वाधार मन्त्री रघुवीर महासेठ, स्वास्थ्य तथा जनसंख्या मन्त्री उपेन्द्र यादव र कृषि तथा पशुपक्षी मन्त्री ज्वालाकुमारी साहलाई पनि बोलाइएको छ । बैठकमा मुख्यसचिव र प्रधानमन्त्री तथा मन्त्रिपरिषद्को कार्यालयका कर्मचारीलाई पनि डाकिएको छ ।