कांग्रेसको ध्यानाकर्षण बेवास्ता गर्दै प्रदेश प्रमुख भट्टद्वारा अधिकारीलाई गण्डकीको मुख्यमन्त्रीमा नियुक्त

२५ चैत, पोखरा । गण्डकी प्रदेशको मुख्यमन्त्रीमा एमालेका खगराज अधिकारी नियुक्त भएका छन् । प्रदेश प्रमुख डिल्लीराज भट्टले संविधानको धारा १६८ (२) बमोजिम दुई वा दुईभन्दा धेरै दलहरूको समर्थनमा अधिकारीलाई मुख्यमन्त्री नियुक्त गरेका हुन् । नेपाली कांग्रेसले असंवैधानिक तरिकाले मुख्यमन्त्री नियुक्त गर्न नमिल्ने भन्दै प्रदेश प्रमुखलाई ध्यानाकर्षणसमेत गराएको थियो । 

कांग्रेसको ध्यानाकर्षण लगत्तै प्रदेश प्रमुखले अधिकारीलाई मुख्यमन्त्रीमा नियुक्त गरेका हुन् । कांग्रेसले  अधिकारीले दावी पेश गरेपछि असंवैधानिक प्रक्रियाबाट मुख्यमन्त्री नियुक्त नगर्न गण्डकी प्रदेश प्रमुखको ध्यानाकर्षण गराएको थियो । मुख्यमन्त्री समेत रहेका कांग्रेस गण्डकी प्रदेशसभा संसदीय दलका नेता सुरेन्द्रराज पाण्डे नेतृत्वको टोलीले प्रदेश प्रमुख डिल्लीराज भट्टको ध्यानाकर्षण गराएको हो ।

आइतबार प्रदेश प्रमुखको कार्यालयमा पुगेर टोलीले चारबुँदे असहमतिपत्र बुझाएको हो । गण्डकीमा सभामुखलाई समेत गणना गरेर आइतबारै नेकपा एमाले, नेकपा माओवादी र दीपक मनाङेले खगराज अधिकारीलाई मुख्यमन्त्री नियुक्त गर्न भन्दै प्रदेश प्रमुखसमक्ष दाबी पेस गरेका थिए । 

नेपालको संविधानको धारा १८२ ले सभामुख सरकार गठनको जोडघटाउबाट अलग रहेको तटस्थ पद हो भनी व्यवस्था गरेको कांग्रेसको भनाइ थियो । तर, यस लगत्तै प्रदेश प्रमुखले अधिकारीलाई मुख्यमन्त्रीमा नियुक्ति गरेका छन् । कोसी प्रदेशमा यसअघि सभामुखलाई समेत गणना गरेर बहुमत पुर्याउँदा सर्वोच्च अदालतले बदर गरेको घटना प्रसंग समेत पत्रमा उल्लेख छ ।