अख्तियारद्वारा आमालाई प्रतिवादी बनाएर लुम्बिनीका योजना प्रमुख भट्टराईविरुद्ध अदालतमा मुद्दा दायर

२५ चैत, काठमाडौं । अख्तियार दुरुपयोग अनुसन्धान आयोगले आमा जनक नन्दिनी भट्टराईलाई समेत प्रतिवादी बनाएर लुम्बिनी विकास कोषका योजना प्रमुख इन्जिनियर सरोज भट्टराई विरुद्ध विशेष अदालतमा भ्रष्टाचार मुद्दा दर्ता गराएको छ । अख्तियारले इन्जिनियर भट्टराई र उनकी आमा जनक नन्दिनी भट्टराई विरुद्ध मुद्दा दर्ता गरेको हो । 

भट्टराईले भ्रष्टाचार गरी भक्तपुरमा कित्ता नम्बर १३७४ को २ रोपनी ९ आमा एक दाम र कित्ता नम्बर १३७५ को २ आना एक पैसा जग्गा आफ्नो नाममा दर्ता गराएको अख्तियारको भनाइ छ । उनले जग्गा खरिद गर्नका लागि लुम्बिनी विकास कोषमा ठेक्काको काम गर्ने निर्माण सेवाका प्रोप्राइटरसँग घुस माग गरी ठेक्का ती प्रोप्राइटरको बैंक खाताबाट जग्गा बिक्रेताको बैंक खातामा ४० लाख र जग्गा खोजिदिने व्यक्तिको खातामा ४० लाख गरी ८० लाख रुपैयाँ पठाइदिएको खुलेको थियो । 

पछि जग्गा खोजिदिने व्यक्तिले समेत जग्गा धनीको बैंक खातामा ३८ लाख ७ हजार २ सय रुपैयाँ पठाइदिएको खुलेको थियो । अख्तियारले भट्टराईलाई ८० लाख बिगो कायम गरी कैद सजाय, बिगो बमोजिम जरिवाना र जग्गा जफतको दाबीसहित विशेष अदालतमा मुद्दा दायर गरेको आयोगका प्रवक्ता नरहरि घिमिरेले जानकारी दिए । उनकी आमा जनक नन्दिनी भट्टराईलाई पनि सरोज भट्टराईलाई हुने सजाय सरह नै माग दावी गरिएको छ ।