यस्तो बन्यो फिल्म ‘बोक्सीको घर’को ट्रेलर

२५ चैत, काठमाडाैं । फिल्म ‘बोक्सीको घर’को ट्रेलर सार्वजनिक भएको छ । केकी अधिकारीको शीर्ष भूमिका रहेको फिल्ममा अन्धविश्वास र पितृसत्तात्मक सोचले जकडिएको एक नेपाली गाउँको कथावस्तु समावेश गरिएको छ । 

आइतबार राजधानीमा सार्वजनिक गरिएको फिल्मको ट्रेलरमा बोक्सीको नाममा महिलामाथि हुने हिंसा, आधारभूत मानवअधिकार, मानसिक स्वास्थ्यको प्रश्न फिल्मले उठाएको छ । २ मिनेट ३० सेकेण्ड लामो ट्रेलरमा कथावस्तु, सेटिङ र चरित्र चित्रणबारे प्रकाश पारिएको छ ।

वास्तविक घटनाक्रमलाई आधार बनाएर सुलक्षण भारतीले निर्देशन गरेको फिल्ममा कथित बोक्सीको भूमिकाका लागि केकीले जीवन्त अभिनय गरेकी छन् । केकीको होमप्रोडक्सन केकी अधिकारी फिल्म्सको ब्यानरमा निर्माण भएको यो फिल्मलाई बद्री अधिकारीले निर्माण गरेका हुन् ।

फिल्ममा सुपला सापकोटा, सुलक्षण, रमा थपलिया, सुष्मा निरौला, जीवन बराल, सविन बाँस्तोलाको पनि अभिनय छ । यो फिल्म बैशाख १४ गते प्रदर्शन तयारीमा छ ।