कोशीका मुख्यमन्त्रीले मध्यावधीमा जाने चेतावनी दिइरहेका बेला सरकारबाट बाहिरियो माओवादी

२६ चैत, विराटनगर । नेकपा माओवादी कोशी सरकारबाट बाहिरिएको छ । प्रदेश सरकारमा रहेका तीन मन्त्रीलाई फिर्ता बोलाएर माओवादी प्रदेश सरकारबाट बाहिरिएको हो । मुख्यमन्त्री केदार कार्कीले भने मध्यावधीमा जाने चेतावनी दिएका छन् । एमाले नेतृत्वमा सरकार बनाउन राजी हुँदै माओवादी सरकारबाट बाहिरिएको हो ।  

सोमबार बसेको प्रदेश संसदीय दलको बैठकले मन्त्रीहरूलाई फिर्ता बोलाउने निर्णय गरेको हो । माओवादीका मन्त्रीहरू राजेन्द्र कार्की, गणेश उप्रेती र नारायण बुर्जाले राजीनामा गर्ने निर्णय भएको संसदीय दलका नेता इन्द्र आङ्बोले जनाए । आङ्बोले माओवादीले पनि विश्वासको मत फिर्ता लिएर सोमबार नै संसद्को बहुमत सदस्यले वैकल्पिक सरकार बनाउन सहयोग गर्ने जानकारी दिए । 

कोशी प्रदेशमा एमालेले सरकारको नेतृत्व गर्ने सहमति भए पनि मुख्यमन्त्री केदार कार्की संविधानको धारा १६८ को उपधारा ५ अनुसार नियुक्त भएका थिए । कांग्रेसका सांसद उनले प्रदेश सदस्यको हैसियतले बहुमतसिद्ध गरी मुख्यमन्त्री दाबी गरेका थिए । एमालेको सहयोगमा मुख्यमन्त्री भएका उनलाई पछि माओवादीले समर्थन गरेपछि विश्वासको मत लिएका थिए । 

कांग्रेसका कार्कीले सरकार निर्माणका लागि अन्तिम धारा १६८ (५) प्रयोग भएकाले मध्यावधिको चेतावनी दिए पनि संविधानविद्ले बहुमतसिद्ध गर्न सक्ने दलले मुख्यमन्त्री दाबी गर्न सक्ने बताउँदै आएका छन् । माओबादी बाहिरिएपछि कोशीमा पनि संवैधानिक संकट सुरु भएको छ ।