नेसनल मेडिकल कलेजमा प्रहरीको छापा, सञ्चालक अन्सारी र ल्याब प्रमुख साह पक्राउ

२६ चैत, काठमाडौं । वीरगन्जको नेशनल मेडिकल कलेजमा प्रहरीले छापा मारेको छ । प्रहरीले कलेजका सञ्चालक सानबास अन्सारी र ल्याब प्रमुख सञ्जय साहलाई पक्राउ गरेको छ । उनीहरुलाई जिल्ला प्रहरी कार्यालय पर्साको टोलीले सोमबार दिउँसो पक्राउ गरेको हो ।

मेडिकल कलेजले म्याद गुज्रिएका सामाग्री प्रयोग गर्ने गरेका गुनासो आएपछि प्रहरीले अनुसन्धान गरेको थियो । सो क्रममा म्याद गुज्रिएका सामाग्री समेत बरामद गर्नुका साथै दुई जनालाई पक्राउ गरिएको पर्सा प्रहरीका प्रमुख एसपी कुमोध ढुंगेलले नेपालबहसलाई जानकारी दिए ।
 
म्याद सकिएका औषधि बिक्री–वितरण गर्ने गरिएको सूचनाका आधारमा प्रहरीले छापा मारेको थियो । सोही क्रममा सञ्चालकलाई पक्राउ गरेर अनुसन्धान अघि बढाइएको पर्सा प्रहरीले जनाएको छ ।