संसदको ल्होत्से हलमा कांग्रेस संसदीय दलको बैठक

२७ चैत, काठमाडौं । नेपाली कांग्रेस संसदीय दलको बैठक चलिरहेको छ । सहकारीको रकम हिनामिना प्रकरणमा मुछिएका गृहमन्त्री रवि लामिछानेमाथि संसदीय छानबिन समिति गठन हुनुपर्ने माग राख्दै आएको कांग्रेसले सोही विषयमा छलफल गर्न संसद भवन नयाँबानेश्वरको ल्होत्से हलमा बैठक राखेको हो । 

यही चैत २१ गते बसेको प्रतिनिधि सभा बैठकमा कांग्रेस महामन्त्री विश्वप्रकाश शर्माले सरकारले संसदीय छानबिन समिति नबनाए प्रतिनिधि सभाको अर्को बैठक चल्न नदिने बताएका थिए । आज बिहान ११ बजे प्रतिनिधि सभा बैठक बोलाइएको छ । बैठकलाई विनाअवरोध सन्चालन गराउने प्रयासमा सोमबार सभामुख देवराज घिमिरेले प्रमुख दलका शीर्ष नेताहरुसँग छलफल समेत गरेका थिए । तर कांग्रेस आफ्नो अडानमा कायमै रहेपछि बैठक निष्कर्षविहीन भएको थियो ।