राष्ट्रियसभा उपाध्यक्षको लागि आज उमेदवारी दर्ता

२७ चैत, काठमाडौं । राष्ट्रिय सभा उपाध्यक्ष पदका लागि आज उम्मेदवारी दर्ता हुँदै छ । मंगलबार बिहान ११ बजेर ४५ मिनेटदेखि १ बजेर ४५ मिनेटसम्म उपाध्यक्ष पदमा निर्वाचित गरियोस् भनी प्रस्तावको सूचना दर्ता गरिने संसद सचिवालयले जनाएको छ । 

मनोनयन दर्ता कार्यक्रम नयाँ बानेश्वरस्थित संघीय संसद् भवनको ल्होत्से हलमा हुनेछ । गत चैत १५ गते राष्ट्रियसभाकी उपाध्यक्ष उर्मिला अर्यालले पदबाट राजीनामा दिएकी थिइन् । माओवादी केन्द्रकी सांसद अर्याल २०७९ माघ २३ गते राष्ट्रियसभाको उपाध्यक्षमा निर्विरोध निर्वाचित भएकी थिइन् । 

फागुन २१ गते सत्ता समीकरण परिवर्तन भएपछि राष्ट्रियसभाको उपाध्यक्ष पद एमालेले पाउने सहमति भएको थियो । संविधानले राष्ट्रियसभाको अध्यक्ष र उपाध्यक्षमध्ये एकजना महिला हुने गरी निर्वाचन गर्नुपर्ने व्यवस्था गरेको छ । राष्ट्रियसभा उपाध्यक्षका लागि बुधबार निर्वाचन हुनेछ ।