संघीय राजधानीमा राप्रपाको गणतन्त्र विरोधी प्रदर्शन

२७ चैत, काठमाडौं । राष्ट्रिय प्रजातन्त्र पार्टी (राप्रपा)ले संघीय राजधानी काठमाडौंमा प्रदर्शन गरेको छ । उसले संघीयता र गणतन्त्र विरोधी नारा लगाउँदै प्रदर्शन गरेको हो । व्यवस्था परिवर्तनका लागि भन्दै राप्रपाले भृकुटीमण्डपमा भेला भएर प्रदर्शन सुरु गरेको हो ।

राप्रपाले सरकार समक्ष पेश गरेको ४० बुँदे माग पूरा गराउन दवाव दिने उद्देश्यले काठमाडौं केन्द्रित जन प्रदर्शन सुरु गरेको पार्टी प्रवक्ता एवं प्रचार विभाग प्रमुख मोहनकुमार श्रेष्ठले जानकारी दिए । राप्रपाले गणतन्त्र खारेज गर्नुपर्ने, राजासहितको शासन व्यवस्था हुनुपर्ने, धर्मनिरपेक्षता खारेज गरी नेपाललाई हिन्दू राष्ट्र घोषणा गर्नुपर्ने लगायतका नारा लगाइएका छन् । 

प्रदर्शनको नेतृत्व पार्टी अध्यक्ष राजेन्द्र लिङ्देन आफैंले गरेका छन् । प्रदर्शनमा सहभागीहरूले निषेधित क्षेत्र तोड्न सक्ने भएकाले काठमाडौंमा सुरक्षा व्यवस्था कडा पारिएको छ । प्रहरीले राप्रपाका कार्यकर्तामाथि निगरानी बढाएको छ । प्रदर्शनपछि नेताहरूले सम्बोधन गर्ने छन् ।