राप्रपाको प्रदर्शनमा प्रहरी र प्रदर्शनकारी बीच झडप

२७ चैत, काठमाडौं । राष्ट्रिय प्रजातन्त्र पार्टी (राप्रपा) को प्रदर्शनमा झडप भएको छ । प्रहरी र प्रदर्शनकारीबीच काठमाडौंको भद्रकालीमा झडप भएको हो । 

प्रदर्शनकारी निषेधित क्षेत्रभित्र प्रवेश गर्न खोजेपछि प्रहरीले बल प्रयोग गरेको थियो । प्रदर्शनकारीलाई तितरवितर पार्न प्रहरीले अश्रुग्यास प्रहार गरेको छ । 

गत फागुन ९ गते प्रधानमन्त्री पुष्पकमल दाहाल प्रचण्डलाई ४० बुँदे माग पत्र बुझाएर आन्दोलनमा होमिएको राप्रपाले ती माग पूरा गर्न दबाब दिनका लागि जन प्रदर्शन गरेको हो । जन प्रदर्शनमा काठमाडौंका दर्जनौं स्थानबाट जुलुस निकालिएको छ । जुलुसमा अध्यक्ष राजेन्द्र लिङ्देन र वरिष्ठ नेता पशुपति शमशेर जबरासहित सहभागी छन् ।