गण्डकी सरकारविरुद्ध कांग्रेसले दर्ता गर्यो सर्वोच्चमा रिट, भोलि प्रारम्भिक सुनुवाइ

२७ चैत, काठमाडौं । नेपाली कांग्रेसले गण्डकी प्रदेशका मुख्यमन्त्रीको नियुक्ति गैर संवैधानिक तरिकाले भएको भन्दै सर्वोच्च अदालतमा रिट दर्ता गराएको छ । यसको भोलि बुधबार पेशी ताकिएको छ । गण्डकी प्रदेशका निवर्तमान मुख्यमन्त्री सुरेन्द्रराज पाण्डेले उक्त रिट दायर गरेका हुन् । 

बुधबार प्रारम्भिक सुनुवाइपछि अन्तरिम आदेश भएमा मुख्यमन्त्री खगराज अधिकारी नेतृत्वको गण्डकी सरकार ढल्नेछ । अन्तरिम आदेश नभएमा भने अन्तिम आदेश नहुँदासम्म गण्डकीमा नेकपा एमाले संसदीय दलका नेता अधिकारी नेतृत्वको सरकार कायम रहनेछ ।

सभामुखसहितको हस्ताक्षरमा बहुमत देखाएर अधिकारी सोमबार मुख्यमन्त्री बनेका थिए । गण्डकी प्रदेशका सभामुखको हस्ताक्षरसहितको दाबी सदर नगर्न भन्दै पाण्डेले प्रदेश प्रमुखको ध्यानाकर्षण समेत गराएका थिए । तर, अधिकारी मुख्यमन्त्री नियुक्त भएपछि पाण्डे सरकार गठनको प्रक्रियामा प्रश्न उठाउँदै मंगलबार सर्वोच्च पुगेका हुन् ।
 
गण्डकी प्रदेशका मुख्य न्यायाधिवक्ता चिरञ्जीवी शर्माका अनुसार दर्ता भएको रिटमा भोलि पेसी तोकिएको छ  । भोलि प्रारम्भिक सुनुवाइ हुनेछ । रिटमा अन्तरिम आदेश माग्दै संविधान र कानूनविपरीत भएको सरकार गठनको प्रक्रिया रोक्न माग गरिएको छ । कांग्रेसको सोमबारको पदाधिकारी बैठकले गण्डकीका मुख्यमन्त्री नियुक्ति विरुद्ध सर्वोच्च जाने निर्णय गरेको थियो ।