राष्ट्रिय सभामा कांग्रेसको प्रश्न, ‘मुख्यसचिव अर्याल र अख्तियार प्रमुख राईमाथि किन छानबिन नहुने’ ?

२९ चैत, काठमाडौं । नेपाली कांग्रेसले विभिन्न भ्रष्टाचार प्रकरणमा नाम मुछिएर आएका सरकारका मुख्यसचिव बैकुण्ठ अर्याल र अख्तियार दुरुपयोग अनुसन्धान आयोगमा प्रमुख आयुक्त प्रेमकुमार राईमाथि छानबिन गर्न किन नमिल्ने भन्दै प्रश्न उठाएको छ । अख्तियार प्रमुख राई र मुख्यसचिव अर्याल विभिन्न काण्डमा दोषी रहेको भन्दै प्रमाणसहितका विवरणहरू बाहिर आउँदा पनि कारवाहीको प्रसंग नै नउठाएको कांग्रेसको भनाइ छ ।  

राष्ट्रिय सभाको बुधबारको बैठकमा नेपाली कांग्रेसका सांसद जीतजंग बस्नेतले भ्रष्टाचारमा अख्तियार प्रमुख प्रेमकुमार राई र मुख्यसचिव बैकुण्ठ अर्यालमाथि किन छानबिन नहुने भन्दै प्रश्न उठाएका हुन् । बस्नेतले कानुन सबैका लागि बराबर हुने कस्तो अभ्यास हुँदैछ भन्दै प्रश्न उठाए ।

देशमा धेरै भ्रष्टाचारका काण्डहरू सुनिन थालिएको छ । धेरै काण्डमा अख्तियार प्रमुख प्रेमकुमार राई र मुख्यसचिव बैकुण्ठ अर्यालको नाम सुनिन थालेको छ । त्यो भुटानी शरणार्थी प्रकरणमा किन नहोस्, वाइड बडीमा किन नहोस् टेरामक्स केसमा किन नहोस्, बस्नेतले भने, उहाँहरू छानबिनको दायरामा पर्ने कि नपर्ने, उहाँहरूमाथि छानबिन गर्नुपर्ने कि नपर्ने ? सभा समक्ष यो प्रश्न जवाफ चाहिन्छ ।