कांग्रेसको माग छल्न संसद अधिवेशन अन्त्य गर्ने तयारी

३० चैत, काठमाडौं । सरकारले संसदको हिँउदे अधिवेशन अन्त्य गर्ने तयारी गरेको छ । शुक्रबार यसबारे प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच संसदको हिउँदे अधिवेशन अन्त्य गर्नेबारे छलफल भएको हो । 

मन्त्रिपरिषद बैठकअघि प्रधानमन्त्रीलाई भेट्न सिंहदरबार पुगेका ओलीले नेपाली कांग्रेसले संसद चल्न नदिएकाले अन्त्य हुनसक्ने बताए । नेपाली कांग्रेसले उपप्रधान तथा गृहमन्त्री रवि लामिछाने सहकारी ठगी प्रकरणमा जोडिएको भन्दै संसदमा कारवाहीको माग गरिरहेको छ । कांग्रेसले संसदीय छानबिन समिति गठनको माग राखेर संसद चल्न अवरोध गरिरहेको भन्दै कांग्रेसको माग छल्न अधिवेशन अन्त्य गर्न लागिएको हो । 

छलफलपछि एमाले अध्यक्ष ओलीले कांग्रेसले संसद चल्न नदिने भएपछि अधिवेशन अन्त्य गर्ने विषयमा छलफल भएको जानकारी दिए । आज बस्ने मन्त्रिपरिषदको बैठकले अधिवेशन अन्त्यका लागि सिफारिस गर्ने सम्भावना छ ।