हट्यो माइतीघरदेखि बानेश्वरसम्मको निषेधाज्ञा

३० चैत, काठमाडौं । सरकारले काठमाडौंस्थित माइतीघरदेखि बानेश्वरसम्म कायम गरिएको निषेधित क्षेत्र हटाएको छ । गृह मन्त्रालयको निर्देशनमा काठमाडौं जिल्ला प्रशासनले निषेधित क्षेत्र हटाएको हो । काठमाडौं जिल्ला प्रशासनले सुरक्षा चुनौती विश्लेषण गरेर निषेधाज्ञा हटाइएको जनाएको छ ।

हाललाई सुरक्षा चुनौती विश्लेषणका आधारमा जिल्ला सुरक्षा समिति, काठमाडौंको मिति २०८०/१२/३० को सिफारिस अनुसार माइतीघर मण्डलादेखि बानेश्वर (कृष्ण टावर) सम्मको क्षेत्रलाई मिति २०८१/०१/०१ देखि उक्त निषेध आदेश कायम नरहने बेहोरा सम्बन्धित सबैलाई सूचित गरिन्छ, सहायक प्रमुख जिल्ला अधिकारी हरिप्रसाद शर्माले एक सूचनामार्फत भनेका छन् । प्रशासनले गएको फागुन ४ गते दुई महिनासम्मका लागि निषेधित क्षेत्र घोषणा गरेको थियो ।