अब राजतन्त्र फर्काउन सम्भव छैन, गणतन्त्रलाई नै सुधारेर लानुपर्छः देउवा

२ वैशाख, काठमाडौं । नेपाली कांग्रेसका सभापति शेरबहादुर देउवाले देशमा राजतन्त्र फर्काउने कुरा अब असम्भव भएको बताएका छन् । अब नेपालका लागी गणतान्त्रिक व्यवस्थालाई बलियो बनाएर लैजानुपर्ने उनको भनाइ छ । उनले गणतन्त्रलाई सुधारेर अगाडि बढाउन सबैसामु आग्रह पनि गरेका छन् । 

आइतबार काठमाडौंमा आयोजित कार्यक्रमलाई सम्बोधन गर्दै देउवाले गणतन्त्र खराब व्यवस्था नभएको भन्दै उनले यसमा देखिएका कमीकमजोरीलाई सुधार्नु पर्ने बताए । सभापति देउवाले गणतन्त्रको विकल्प अरू हुन् नसक्ने भएकाले यही व्यवस्थालाई सुदृढ गरेर जानुपर्नेमा जोड दिए । 

उनले विगतमा बन्दुक उठाएकाहरूले पनि अहिले बहुदलीय व्यवस्था मानेर अगाडि बढेको बताउँदै राजतन्त्र भन्नेहरू पनि यसैमा अटाइरहेको बताए । बन्दुक उठाउने देखि पहिलेका राजावादीहरूलाई गणतन्त्रमा स्पेस भएकाले अब बहुदलीय व्यवस्थालाई सुदृढीकरण गर्दै अगाडि बढ्नुको विकल्प नभएको बताए । 

सभापति देउवाले जनताको अधिकार, विकास, समृद्धि सबैका लागि यो व्यवस्था उपयुक्त भएको बताए । ‘गणतन्त्रको अभ्यास भएको लामो समय भइसक्यो, यसलाई थप स्वीकार्य बनाएर जाने ठाउँ छ,’ उनले भने, ‘काम गर्दा केही समस्या आउँछन्, जे भए पनि सुधार गरेर जाऔँ । अब राजा आउने सम्भावना छैन ।’

उनले भने, ‘बहुदलीय व्यवस्था मात्रै होइन, हुँदाहुँदा राजा नै गए । अब ती राजा पनि मरे । उनका छोराछोरीहरू सबै मरे । अर्को राजा आएपछि त झन् ऊ चाहिँ आफैँ गए । उनी पनि अहिले टिक्न नसकेर हट्नुपर्यो । त्यसैले यस्तो यो अहिलेको यो नेपालमा गणतन्त्र आएको छ, यद्यपि राजा फर्काउनुपर्यो भनेर मान्छेहरू हिँड्दैछन् । राजा फर्किन्छ भन्ने होइन । यही व्यवस्थालाई अझ समयको स्वीकार्य बनाएर लैजाऔँ ।’