जनताको नाम लिएर कांग्रेसले असंसदीय कार्य गरेकाले अधिवेशन अन्त्य गर्नुपर्योः ओली

२ बैशाख, काठमाडौं । नेकपा एमालेका अध्यक्ष केपी ओलीले नेपाली कांग्रेसले संसदमा असंयमित हुने संकेत गरेका कारण संसदको हिउँदे अधिवेशन अन्त्य गर्नुपरेको बताएका छन् । उनले जनताको नाम लिएर कांग्रेसले संसद् अवरोध गरिरहने भएकाले अधिवेशन अन्त्य गरिएको बताएका छन् । ओलीले संसदीय प्रणालीका मान्यता अनुरूप समाधान खोज्न कांग्रेससँग आग्रह गरेका छन् । 

आइतबार संसद् भवन परिसरमा पत्रकारहरूलाई संक्षिप्त प्रतिक्रिया दिँदै ओलीले भने, ‘कांग्रेसले आक्रोश, पीडाले जे पायो त्यही बोलिराखेको छ । यस्तो गर्नुहुँदैन । संसदीय प्रणालीलाई संसदीय प्रणालीकै रूपमा रक्षा गर्नुपर्छ । कांग्रेसले जति सारो जनताको नाम लिइराखेको छ, त्यति जनतालाई पिर परेको छैन जति कांग्रेसलाई परेको छ । कांग्रेसको साह्रोगाह्रोले गर्दा यस्तो भइराखेको छ ।’

जेठ १५ मा बजेट प्रस्तुत गर्नुपर्ने र त्यसअघि नै नीति तथा कार्यक्रम पास गर्नुपर्ने व्यवस्था स्मरण गराउँदै उनले समयको सीमाका  कारण पनि संसद् अधिवेशन अन्त्य गर्नु उपयुक्त रहेको प्रस्ट पारे । यतिबेला हिउँदे अधिवेशन बन्द हुनै पर्थ्याे, बजेट अधिवेशन सुरु हुनैपर्छ । कम्तीमा १५ दिनको ग्याप राख्नैपर्छ । जेठ १५ गते त विनाअलमल बजेट प्रस्तुत गर्नुपर्छ । त्योभन्दा अगाडि नीति तथा कार्यक्रम पास गर्नुपर्छ, यसैले संसद अवरोध गरिराख्नु भन्दा अन्त्य गर्दा राम्रो हुने देखियो, अध्यक्ष ओलीले भने ।