सुदूरपश्चिमको मुख्यमन्त्रीमा रेशम पक्षका लक्ष्मणकिशोर  र रञ्जिता पक्षका कैलाश चौधरीले पेश गरे दावी

२ वैशाख, धनगढी । सुदूरपश्चिम प्रदेशको मुख्यमन्त्रीमा नागरिक उन्मुक्तिका पार्टीका अर्का सांसद कैलाश चौधरीले पनि दावी पेश गरेका छन् । उनी पार्टी अध्यक्ष रञ्जिता चौधरी श्रेष्ठ पक्षका हुन् । यसअघि रेशम पक्षका लक्ष्मणकिशोर चौधरीले कांग्रेस र नेकपा एकीकृत समाजवादी समर्थनमा मुख्यमन्त्रीमा दावी पेश गरेका थिए । 

कैलाशले नेकपा एमाले र नेकपा माओवादी केन्द्रको समर्थनमा मुख्यमन्त्रीमा दाबी पेश गरेका हुन् । प्रदेश प्रमुख नजिर मियाले अर्को पक्षले पनि मुख्यमन्त्रीमा दाबी पेश गरेकाले कानुनी परामर्शपछि निर्णय गर्ने जवाफ दिएका छन् । नाउपाकै लक्ष्मणकिशोर चौधरीले मुख्यमन्त्रीमा दावी पेश गरेपछि उनले पनि पेश गरेका हुन् । 

लक्ष्मणकिशोर चौधरीले नाउपासहित नेपाली कांग्रेस, नेकपा एकीकृत समाजवादी र राप्रपाका गरी २७ सांसदको साथ आफूलाई रहेको चौधरीको दाबी छ । नाउपा संसदीय दलको नेताबाट कारवाही गरिएका घनश्याम चौधरी, नेपाली कांग्रेस संसदीय दल नेता कमलबहादुर शाह र एकीकृत समाजवादी संसदीय दल नेता दीर्घ सोडारीको हस्ताक्षर भएको पत्रसहित नाउपा सांसद चौधरीले संविधानको धारा १६८ को उपधारा २ अनुसार मुख्यमन्त्री दाबी पेस गरेका छन् ।

सुदुरपश्चिममा कांग्रेसका १८, एकीकृत समाजवादीका चार, नाउपाका रेशम चौधरी पक्षका ४ र राप्रपाका १ जना सांसद छन् । ५३ सदस्यीय प्रदेश सभामा बहुमतका लागि २७ सांसदको साथ चाहिन्छ । चौधरीले आइतबार दिउँसो २ बजेर ५७ मिनेटमा मुख्यमन्त्रीमा दाबी पेस गरेका हुन् ।

दाबी पेस गर्न प्रदेश प्रमुखकोमा चौधरीसहित कांग्रेस संसदीय दल नेता विक्रम धामी, नाउपाका घनश्याम चौधरी, राप्रपाका सांसद खेमा विष्ट पुगेका थिए । एकीकृत समाजवादीका सांसदहरूले चौधरीलाई मुख्यमन्त्री बनाउन लिखित सहमति गरेका छन् ।