मुख्यमन्त्री कार्कीलाई अल्टिमेटम दिँदै कोशी सरकारविरुद्ध एमाले र माओवादीले दर्ता गराए संकल्प प्रस्ताव

३ वैशाख, विराटनगर । कोशी प्रदेश सरकारका विरुद्ध नेकपा एमाले र नेकपा माओवादीले संकल्प प्रस्ताव दर्ता गरेका छन् । सोमबार कोशी प्रदेशसभाका सचिव गोपालप्रसाद पराजुलीलाई दुई दलले संकल्प पत्र हस्तान्तरण गर्दै दर्ता गराएका हुन् । वैशाख २५ गतेभित्र मुख्यमन्त्री केदार कार्कीले विश्वासको मत लिनुपर्ने नभए राजीनामा दिनुपर्ने बेहोरासहितको संकल्प प्रस्ताव दर्ता गरिएको एमालेले जनाएको छ ।

नियमावलीको नियम ७१ बमोजिम संकल्प प्रस्तावको सूचना प्रदेशसभामा दिएको प्रस्तावका समर्थक पूर्वमन्त्री तथा माओवादी केन्द्रका सांसद गणेश उप्रेतीले बताए ।  एमाले र माओवादीका ५२ जना सांसदको समावेदनको आधारमा प्रदेश प्रमुखले वैशाख ६ गतेलाई प्रदेशसभाको अधिवेशन आह्वान गरेका छन् ।
 
राजीनामा नदिए वा विश्वासको मत पनि नलिए मन्त्रिपरिषदका कुनै पनि निर्णय कार्यान्वयन गर्न बाध्य नहुने बेहोरा संकल्प प्रस्तावमा उल्लेख गरिएको छ । प्रदेशसभा नियमावली, २०७४ (पहिलो संशोधन) समेतको नियम ४७ को उपनियम १ बमोजिमका सर्तका अधिनमा रही सोही नियमावलीको नियम ७० को उपनियम १ को खण्ड (ग) बमोजिम संकल्प प्रस्ताव दर्ता गरिएको जनाइएको छ ।