वैशाख ६ र ७ गते बालबालिकाहरूलाई भिटामिन ए र जुकाको औषधि खुवाइँदै

♦ विशाल बस्नेत 

३ वैशाख, महोत्तरी । नेपाल राष्ट्रिय भिटामिन ए कार्यक्रम हरेक वर्षको ६ र ७ वैशाखमा संचालन हुँदै आएको  छ । सोही अनुसार महोत्तरीमा यसको व्यापक तयारी गरिएको छ ।

जिल्लाका १५ वटै स्थानीय तहहरूमा ६ महिना देखि ५९ महिनासम्मका बालबालिकाहरूलाई निर्धारित मितिमा भिटामिन ए क्याप्सुल जिल्ला स्वास्थ्य कार्यालयले जनाएको छ ।

यसको लागी जिल्लाभर स्वास्थ्यकर्मीहरूलाई तयार बनाई सकिएको जिल्ला स्वास्थ्य कार्यालय महोत्तरी कि फोकल पर्सन प्रतिभा सिंहले जानकारी दिइन ।

शरीरलाई स्वस्थ-तन्दुरुस्त राख्न र उचित विकास गर्न महत्त्वपूर्ण मानिएको भिटामिन ए क्याप्सुलसँगै जुकाको औषधि समेत खुवाइने जिल्ला स्वास्थ्य कार्यालयले सोमबार एक पत्रकार सम्मेलनका बीच कार्यतालिका नै सार्वजनिक गरेको छ  ।

जिल्लाको कुल जनसंख्या मध्ये ५० हजार भन्दा बढी उक्त उमेर समूहका बालबालिकाहरूलाई भिटामिन ए क्याप्सुल खुवाइनेछ भने जुकाको औषधि १ देखि ५ वर्षसम्मका बालबालिकालाई खुवाइनेछ ।

बालबच्चामा भिटामिन ‘ए’ को कमी भएमा अन्धोपन र छालामा हुने समस्याका साथै उनीहरुको उमेर अनुसार हुनुपर्ने शारीरिक तथा मानसिक विकासमा कमी आउने भएकाले यो खुवाउन महत्त्वपूर्ण रहेको स्वास्थ्यकर्मीहरू बताउँछन् ।

स्वास्थ्यकर्मी तथा फोकल पर्सन सिंहका अनुसार भिटामिन ए कै कमिको कारण  दाँत र हड्डीको पर्याप्त विकास हुन पाउँदैन भने ५ वर्ष मुनिका बालबच्चाको मृत्यु दर अरु बच्चाको तुलनामा ४ गुणा उच्च हुने गर्दछ ।

नेपालमा सन् १९९३ पूर्व ५ वर्ष मुनिका बालबच्चाको मृत्यु दर उच्च थियो जसको एउटा कारण भिटामिन ‘ए’ को कमी पनि भएको एक अध्ययनले देखाएको छ ।  १९९३ देखि सरकारले भिटामिन ‘ए’ क्याप्सुल खुवाउने अभियान सुरु गरेपछि ५ वर्ष मुनिका बालबच्चाको मृत्यु दर क्रमशः घट्दै गएको तथ्यांकले देखाएको छ ।

महोत्तरीमा आफ्ना बालबालिकालाई नजिकैको महिला सामुदायिक स्वास्थ्य स्वयंसेवकका मार्फत भिटामिन ए र जुकाको औषधि खुवाउन र सम्बन्धित पालिकाको स्वास्थ्य शाखामा सम्पर्क गर्न स्वास्थ्यकर्मीहरूले अनुरोध गरेका छन ।